Friday, April 24, 2015

ඉන්දුමතී

මං වැඩපොලක අත් උදව්වට යද්දී මගේ වයස අවුරුදු අටයි. සුදු ගවුම කහට පාට උනත් ඒක ඇඳගෙන ඉස්කෝලේ යන්න මම ආස උනත් , අපේ ගෙදර මට බාල නංගිලා දෙන්නෙකුයි , මල්ලිලා දෙන්නෙකුයි ඉද්දි මං එහෙම ගසල බසල දාල ඉස්කෝලේ ගිහින් හරියනවද? වැඩ කරලා ආව මහන්සියි කියල ආයේ බුදියාගන්න පුලුවන්ද?
නංගිලා ට මට ඔන්න ඔහේ තියෙන දෙයක් කාලා ඉන්න පුළුවන් උනාට මල්ලිලා දෙන්නටයි, අප්පටයි මොනවා හරි හදන්න එපැයි. බිලා ආව කියල, ගෙදරට සල්ලි දුන්නේ නෑ කියල , බත් පිඟාන පොලේ ගැහුවා කියල අප්පව අහක දාන්න පුලුවන්ද?
තන්ගමනිගේ කරේ අලුතින් හදපු රත්තරන් චේන් පොට දැකල මගේ ඇස් ගිනිකන වැටෙන කොට මට අවුරුදු දාහතක් විතර වෙන්න ඇති. රත්තරන් චේන් පොටක් හදාගන්න කියල හිතාගෙන මාත් මාසයක් ගානේ සල්ලි කීය කීය හරි එකතු කරන්න පටන් ගත්තේ ඊට පස්සේ තමයි.
ලොකු කෙල්ලේ.. ලොකු මල්ලි පෝන් එකක් ගන්න ඕනේ කියල කරදර කරනවා. ඔන්න ඔහේ උඹ එකතු කරපු සල්ලි ටික දීල දාහන්.. ආයේ උඹට එකතු කරගන්න බැරියැයි. කොල්ල පව්නේ..
ජිවිතේ පලවෙනි පාරට මම සල්ලි දෙන්න අදි මදි කරනකොට අම්ම කුල කියවන්න පටන් ගත්තේ ගමටම ඇහෙන්නයි. දවස් ගානක් ඉවසල බැරිම තැන මං එකතු කර ගත්ත රුපියල් අටදහ එහෙම පිටින්ම අම්මට දීල දැම්ම.
ලොකු නංගි මාස හතරක් තිස්සේ ගල් කඩල අලුත් කරාඹු දෙකක් ගන්න එකතු කරපු සල්ලිත් දාල මල්ලි ගත්තු පෝන් එක, මාසයක් යන්න කලින් යාළුවොත් එක්ක ඔට්ටු තියල පැරදුනේ වෙලාවෙවත් මල්ලිට බැන්නේ නැති අම්මා ලොකු නංගි, දෙවැනි නංගිට අලුත් ගවුමක් අරන් දුන්න වෙලාවේ බැන අඬගැහුවේ හරියට මුළු ගෙදරටම මාසයක් කන්න තියෙන සල්ලි වියදම් කරපු ගානටයි
කඩේට යන එනකොට හීනියට හිනාවුණු යෝගා එක්ක කාටත් හොරෙන් පැල් ගැහෙන්න ජිවිතේ පලවෙනි වතාවට මම මුරණ්ඩු උනා. අම්මල සාප කළා , පලි ගැහුවා මාසයක් දෙකක් යනකොට අයෙත් කතා කළා
කුමාර වේසෙන් හිටපු යෝගා රාස්ස වේසෙට එනකොට මට ලොකු එකා හම්බෙන්න ඉන්නවා. ගෙවල් වලට කඹුරලා කඹුරලා අන්තිමට හැම බැනුමක්ම අහන්න වෙන අපේ ලයිමේ හුඟක් කෙල්ලෝ තම තමුන්ගේ නිදහස හොයාගෙන කොළඹ ගියත්, මට උනේ ළමයෙකුත් බඩේ තියාගෙන ගිනි ගහන අව්වේ දළු කඩන්නයි
දවසම මහන්සිවෙලා ඇවිත් මට උනේ යෝගගෙන් නිල් වෙනකන් ගුටි කන්නයි. එහෙමයි කියල අයෙත් අම්මල ගාවට ගියත් දවස දෙක යනකොට අම්ම, නැත්තන් මල්ලි කෙනෙක් කුල කියවන්න ගනිද්දී මම එහෙන් එන්නේ ගුටි කාලා මලත් අයෙත් නං ගෙදර යන්නේ නෑ කියලයි
'දුවේ අරූ එක්ක ඉන්න බැයි නං මෙහෙට වෙයන්' කියන්න හරි හිටියේ තාත්ත විතරයි

පොඩි පුතාට අවුරුදු දෙකක් වුනු අවුරුද්දේ යෝගලගේ නංගිලා මාත් එක්ක අපේ ගෙදර එන්න ජෝඩු උනා. උන් ටික අපේ මල්ලිලට අඟර දාපු විදියට අම්මටයි අපේ නන්ගිලටයි ඇල්ලුවේ නෑ. කොහොම හරි උන් ගෙදර ගියේ අපි හැමෝම එක්ක ගිනි මර රණ්ඩුවක් වෙලයි..

'දැන් අපහු ගියොත් නං යෝග මාව මරයි..' එහෙමයි කියල මාවයි මගේ ළමයි දෙන්නවයි බාර ගන්න කවුරුත් ඉන්නවයි කියලද

"තෝ පට්ට *** .. ආවද? තොගේ ** ගෙදර එවුන් මගේ එවුන්ට බැන්නේ මොන හයියකින්ද *****?

මං අන්තිමට දැක්කේ යෝගගේ අතේ තිබුණු ඇඳ පොල්ල මං දිහාවට පාත් වෙන හැටි තමයි.. එතනින් එහාට ...

දැනුත් මට හිතක් හිතුනොත් අපේ ගෙවල් පැත්තට පාවෙලා ගිහින් බලන් ඉන්නවා.. මගේ ළමයි දිහා.. අම්මල දිහා..
මේ අවුරුද්දෙ අපේ ගෙදර අය යෝගගේ ගෙදර ගිහින් කාලා බිල ආවයි කියලවත් මං කාත් එක්කවත් තරහ නෑ. මං ගෙනාපු ආයුෂ ඉවර උනයි කියල අපේ ගෙදර අය, යෝග මක් කරන්නද.....

**ඇසු කතාවක් ඇසුරෙන් ලියන ලද්දකි

කරුණාකර ඔබේ මවට, නැගෙනියට, සහෝදරියට, බිරිඳට, යෙහෙළියට, මග හමුවන කාන්තාවට ගරු කරන්න. වටිනාකමක් දෙන්න.
පිරිමියෙක් වූ පලියට වැඩි සැලකිල්ලක් ලැබීමට ඔබට සුදුසු නැත. එය ඔබේ මවට , පියාට තේරුම් කර දෙන්න
පිරිමි දරුවා සහ ගැහැණු දරුවා සමාන බව ඔබේ බිරිඳට තේරුම් කරන්න
විරුද්ද වෙන්න- මානසික හෝ ශාරීරික කාන්තා හිංසනයට
දැන හදුනන නූගත් මාපියන් වේනම් දැනුවත් කරන්න. පෙළීමට ලක් වුනු එක ගැහැණු දරුවෙකුට හෝ යහපතක් කරන්නට උත්සහ කරන්න
ලොව එලිය වන්නේ කාන්තාවන් නිසාය, ඔවුන්ව රැක ගන්න. ගරු කරන්න


13 comments:

  1. මේකට බ්ලොගර් ෆලෝවරය එකතු කරන්න

    dashboord+layout+add agadget+more gadgets+blogger followers

    ReplyDelete
    Replies
    1. දාන්නන් මචං. බොහොම ඉස්තුතියි තොරතුරට

      Delete
  2. Replies
    1. මේත් අටම්පහුර නේද????

      Delete
  3. රොටියෝ අදයි මේ පැත්තේ ආවේ..අටං අයියා කිව්වා වගේ ෆලෝවරේ දාගනින්..අපට එන්න ලේසි එතකොට..කතාව හොඳයි..ටිකක් ස්පීඩ් වෙලාද මන්දා..ඒත් මං කැමති උඹේ ලියන රටාවට..ජයවේවා! )

    ReplyDelete
    Replies
    1. රොටියා මම ලොකු පොරක් නම් නෙවෙයි..හැබැයි පුලුවන් හැටියට උඹට පොඩි ප්‍රොපගැන්ඩා පාරක් දුන්නා මෙහෙම..මේක කට්ටිය දැකලා නැතුව ඇති කියලා හිතුණා..
      http://tharuwehi.blogspot.com/2015/04/blog-post_29.html

      Delete
    2. ඉස්තුතියි සහයෝගයට!!! ෆ්ලොවරේ දැන් වැඩ

      Delete
  4. ගෘහස්ත හිංසනය මුලු ලෝකය පුරාම අති දරුණු ප්‍රශ්ණයක්. දියුණු යැයි සම්මත රටවල පවා මේ තත්වය තියෙනවා. ලංකාවේ ප්‍රශ්ණය වැඩි වෙන්නේ කසාද බැඳපු ගෑනියෙකුට ඉන් පස්සේ ස්වාධින ජීවිතයක් ගත කරන්න සමාජයෙන් ප්‍රශ්ණ ඇතිවෙන නිසයි.

    ReplyDelete
    Replies
    1. මිනිස්සු ආකල්ප අතින් වෙනස් වෙන්න ඕනේ. සමහර වෙලාවට මානසික හිංසනය , ශාරීරික හිංසනය වගේ දහ ගුණයක් දරුණුයි. ඕනෑම මනුස්සයෙකුට නිසි තැන නිසි ගෞරවය දෙනවනම් මේ ප්‍රශ්න ගොඩක් අඩුවෙයි

      Delete
  5. අපූරුයි කතාව ලියල තියෙන හැටිය නං...
    ඇත්තට අපේ මිනිස්සු හැගීම් බර වෙනව වැඩියි ඒක එකක්
    එතකොට කරන කියන දේ ගැන දැනුමක් නැතිව යනව
    ඒක අනික එතකොට වෙන මේ වගේ දේ වලට වග කියන්නෙ කවුද
    පිස්සු වගේ

    ආයෙත් එන්නංකො

    ReplyDelete
  6. අර පොලුපාර මගේ ඔලුවට වැදුනා වගේ. :(

    ReplyDelete
    Replies
    1. කතාව මුල් වතාවට ඇහුවාම මටත් එහෙමම හිතුනා. වතුකරයේ මේ මෑතකදී සිද්ද වුනු දෙයක්

      Delete