ගෑණු වැරදි සහ පිරිමි වැරදි

ගැහැණු ළමුන් යනු පිරිමි අපට කිසිසේත්ම තේරුම් ගත නොහැකි උත්තරීතර සත්ව කොට්ටාශයක් බව රොටියා මින් පෙර කීප වතාවක්ම ලියා ඇති නිසා ඒ පිළිබඳව වෙනත් අටුවා ටීකා ලිවිම අනවශ්‍යය. එකම දේ නැවත නැවත ලියන්නට යාමේදී කියවන්නා වෙහෙසට පත්වන නිසා අඩු තරමේ ඒ එකම දෙය රොටියා වෙනස් වෙනස් ආකාරයට ලියනවා සේම, රොටියාගේ ගෑණු ළමයාද එකම දෙය විවිද ආකාරයෙන් නැවත නැවත සිද්ද කිරීම සම්බන්ධයෙන් පාශ්චාත් උපාධියක් කර ඇති ගානය. ඒ කියන්නේ රොටියාගේ ගෑණු ළමයාගේ වැරද්දක් පෙන්වා දුන් කල ඈ එය කිසිදු විටෙක නැවත සිදු නොකරන අතර, එම වැරැද්ද වෙනත් විවර්තිත ආකාරයකින් සිද්ද කරන්නද , ඊලඟට ඒ වැරැද්දේ සහ මුල් වැරැද්දේ වෙනස්කම් ගැන විග්‍රහයක් කරන්නද ඇය කෙළ පැමිණ සිටිනවාය

වසර ගානක පළපුරුද්දෙන් රොටියා එක දෙයක් ගැන සම්බන්දයෙන් නම් ඉස් ඉස්තිරයෙන්ම දන්නවාය. ගෑණු බහුතරයකටම වැරැද්දක් වැරැද්දක් ලෙස දකින්න නම් එය පිරිමියෙකු විසින් සිද්ද කල යුතු වන්නේය. ඒ අතුරිනුත් වැරැද්ද සිද්ද කළේ තමුන්ගේ දුකට සැපට ඉන්නා පිරිමියා නම් අන්න එතන ගිනි විජ්ජුම්බරයය. (රොටියාට සමහර විටෙක සිතෙන්නේ , රොටියාගේ ගෑණු ළමයාට ලෝකෙ නරකම පිරිමින් අතුරින් මුලටම පෙනෙන්නේ රොටියාව බවය. රොටියා ඕක කියන්නට ගොස් මේ ළඟදීද ගෑණු ළමයාට යකා නැග්ගේය). පස්සෙන් පහුගිය දිනකදිද ඔය මේල් (Male) වැරදි සහ ෆීමේල් (Female) වැරදි ගැන රොටියාට ප්‍රායෝගික අත්දැකීමක් ලැබුණි.

ඒ කතාව සැකවින් මෙහෙමය. පහුගිය දිනකදී රොටියාට දින කිහිපයකට විදෙස් ගතවන්නට සිදුවූ අතර, හැමදාමත් මෙන් රොටියාගේ ඔක්කෝම ආම්පන්න අසුරා දුන්නේද ගෑණු ළමයාය. (ගෑණු නැති වූ කල පිරිමින් වූ අපට මෙවැනි වෙලාවලදී නම් මොනාවයින් මොනවා වේවිදැයි කියන්නට බැරිය)නිවසින් හැඳ පැළඳ හිස් අතින් එන රොටියාට, ගෑණු ළමයා විසින් විසින් අසුරා ඇති බෑගයද ඊළඟට ලියකිවිලි දැමු ෆයිලයද ලැබේ.

ගමන ගොස් නැවත ලංකාවට සැපත් වූ රොටියාගේ දෙලෝ රත්වන්නට වැඩකටයුතු සිද්ද කරමින්, රොටියාගේ බැංකු පොත් රාජයා ලියකියවිලි අතුරින් අන්තරස්ධාන වී තිබුණි. යන හැමතැනකම අරන් යන නිසා, දියවී කුනුමාළු කෑල්ලක් සිහිගන්වන රොටියාගේ බැංකු පොත වෙනුවට , ATM කාර්ඩ් පතක් ගන්නා ලෙස හැමදාම ඇසෙන ගෑණු ළමයාගේ අවවාද ද මාර සේනා මෙන් රොටියාගේ හිතට කඩා වදින්නට විය.

රොටියා හැරෙන තැපෑලෙන්ම ඇමතුමක් ගත්තේ ගෑණු ලමයාටය

රොටියා: මේ මාර වැඩේනේ..

ගෑණු ළමයා: ඇයි මොකද වෙලා තියෙන්නේ?

රොටියා: මගේ බැංකු පොත මිස් ප්ලේස් වෙලානේ

ගෑණු ළමයා: ෂෝක්.. ඔය ටික කරගන්නකන් ඔයාට නින්ද ගියේ නෑනේ..දැන් කොහෙදිද නැති වෙලා තියෙන්නේ

රොටියා: දන්නේ නෑ අනේ..

ගෑණු ළමයා: නැවතුනු හොටෙල් එකට කෝල් කරලා බැලුවද?

රොටියා: අමතක උනානේ..

ගෑණු ළමයා: ඔයාට නං කියල වැඩක් නෑ අනේ. ඉක්මනට කෝල් කරන්න. මං නැත්තන් ඔයා මොනවා කරගනීද දන්නේ නෑ

නැවතුනු හෝටලයෙන්ද කිව්වේ එහෙව් බැංකු පොතක් රොටියාගේ කාමරයෙන් සොයා නොගත් බවයි

රොටියා: එහෙත් නෑලු..

ගෑණු ළමයා: බැලන්ස් එක චෙක් කරන්න. බෑන්ක් එකට ඉන්ෆොර්ම් කරන්න. අලුත් පොතක් ඕනේ කියන්න.

රොටියා: මම ඔයාට එහෙම අරන් තියන්න කියල දුන්නේ නෑ නේද..

ගෑණු ළමයා: පිස්සුද අනේ.. ඔයා ඉතින් ඔක්කොම කරගෙන අන්තිමට මාව අල්ලන්න. හැමදාම ඔහොමයි

ඉක්බිතිව රොටියා බැංකුවට කතා කොට සිද්දිය විස්තර කල පසු, ඔවුන් පැවසුවේ නැතිවූ පොත වෙනුවට වෙන පොතක් දිය නොහැකි බවත් ඒ වෙනුවට මොකද්දෝ කාර්ඩ් අටමගලයක් ලබා දිය හැකි බවයි. බැංකු හා සබැඳුනු ක්‍රියා පිළිවෙලවල් කවදත් රොටියාට අරහං බැවින්, ඒ කතාවෙන් රොටියාට වැටහුණු එකම දෙය නම් පොලිසියකට ගොස්, පොත නැතිවූ බවට පැමිණිල්ලක් දමා, එය රැගෙන බැංකුවට පැමිණි කල රොටියාගේ බැංකු ගිණුමෙන් මුදල් ගන්නා පිළිවෙලක් සකසා ගත හැකි බවයි

ගෑණු ළමයාට විස්තරේ පැවසු පසු රොටියාට කනපුරා අවවාද (ගෑණු ළමයා ඒවාට අවවාද යයි කිවත්, රොටියා එවැනි දේට කියන්නේ බැනුම් කියාය) ලැබුණු අතර, ඊළඟ දවසේ රොටියා සමග බැංකුවට යෑම පිණිස පැමිණීමටද ඇය ස්ව කැමැත්තෙන්ම ඉදිරිපත් වුවාය.

පහුවෙනිදා පාන්දරින්ම , ඇඳෙන් බහින්නටත් පෙර රොටියාට ඇමතුමක් ලැබුනේ ගෑණු ලමයාගෙනි

ගෑණු ළමයා: ඔයාට අද සප්‍රයිස් එකක් තියෙනවා..

රොටියා: (කලින් දවසේ රොටියා අතින් සිද්ද වුනු වැරැද්ද ඈට අමතක වී ඇතැයි යන සතුටු සිතින්) ඒ මොකද්ද....

ගෑණු ළමයා: ගෙස් කරන්න..

රොටියා: (මෙච්චර තොදොල් වන්නේ ඇයි දැයි සැක සංකා සහිතව) අද ඔයා ලන්ච් හදල මටත් ගේනවා...

ගෑණු ළමයා: (මල අතේ තියාගෙන) මට උයන්න බැරි එක ඔයාට ඔච්චරම ප්‍රශ්නයක් නන් උයන්න පුළුවන් කෙනෙක් බදින්න..(ඈ තාම උයන්නට නොදන්නා අතර ඇගේ ඉවුම් පිහුම් ගැන රොටියා වෙනම කතාවක් පසුව ලියනවාය)

රොටියා: විහිළුවක් අනේ කළේ.. මොකද්ද සප්‍රයිස් එක..

ගෑණු ළමයා: හිතන්නවත් බැයිද..

රොටියා: බෑනේ..

ගෑණු ළමයා: (තාල තියමින්) ඔයාගේ බැංකු පොත මට හම්බුනා

රොටියා: ඔයා කිව්වේ ඔයා ළඟ නෑ කියල..

ගෑණු ළමයා: මං කිව්වේ ඔයා මට දුන්නේ නෑ කියලනේ. කොහොම හරි ඔයා යන දවසේ ,මම ඒක පරිස්සමට අරන් තියල තියෙනවා. බලන්න, මම ළඟ තිබ්බ හින්ද පරිස්සන් වෙලා තිබ්බ..