Wednesday, December 18, 2013

එකෝමත් එක දවසක - 04

මට වස විලි ලජ්ජාවය. ඇස් දෙකට කඳුළු ආපු නොආපු ගානය. තවත් ලජ්ජා වීමට දෙයක් ඉතුරු වී නැති හෙයින් අද කෙසේ හෝ ඇය සමග කතාකරපිය’ යයි මගේ හිත මටම තිත්ත කුණුහරුපෙන් බැනවැදුනේය.

ඈ මීගමුව නගරයට යන්නීය. පොලවට නොරිදෙන ලැසි ගමනකි. මගේ නෙතට රසඳුනකි. ඉතින් මාද පැණි හැලිය සොයා යන ඇඹලයෙකු මෙන් ඇය පිටුපස පියමැනීමි. විනාඩියක් තුල මට ඇය හා පෙළට වැටෙන්නට හැකි විය.


“ඔයා ගම්පහ ක්ලාස් යනවා නේද?”


ඈ මාව මන්මත් කරවන සිනාවක් පෑවාය. (සෑම ගෑණු ළමයෙකුටම පිරිමි ළමුන් වහවැටෙන හිනාවක් ඇත්තේය. ඔවුන් හිනැහෙන විට අපිව සලිත වේ. ඒකට කොල්ලන් වූ අපිට හැක්කේ හිනාවෙන්නට නොව වඳුරන් මෙන් විරිත්තන්නට පමණක්ය. ඒක නම් මාර අසාධාරණය)


“ඔව්”
“ඒක තමයි දැකල පුරුදු නිසා ඇහුවේ?”


නැවත ඒ හිනාව..
කතා නැතිව ගෙවුණු තත්පර බාගෙකට පමණ පසු..
“මොකෝ අද ක්ලාස් කට් කලාද?”
“මට වෙන වැඩක් තියෙනවා හවස. ඒකයි කලින් ආවේ.”


”මමත් පොඩි වැඩක් දාගෙන තියෙනවා හවස.ඔයාගේ ගෙවල් මීගමුවෙමද?” (නැත. ඇය දළුවකොටුවේ බව මම දනිමි)
“නෑ මම දළුවකොටුවේ” (කතාව නියමිත තැනට ආවේ දැන්ය. මෙතනින් එහාට කොල්ලාට ටොයිස් ය)


 “පල්ලිය හරියේද?”
“නෑ ඊට චුට්ටක් එහා. ස්කුබි ලේන් එකේ”


 “මගෙත් යාලුවෙක් ඉන්නවනේ නිශාන්ත කියල ඒ හරියේ. දන්නවද නිශාන්ත අපොන්සු?”
“ම්හ්.. අහල පුරුදු නම් නෑ”


 “අර ටිකක් මහත කොට ඩයල් එකක් ඉන්නේ. නොදන්නවා වෙන්න බෑ. මිනිහ ඒ පැත්තේ ඕනේ වැඩකට බැහැල එනවා” (මා යටකී නිශාන්ත සමග මිතුරු වුයේ ඇගේ විස්තර හොයා ගන්නමය)
“මට නම් මතකයක් නෑ..”


මෙතැනදී මම පොඩි හිනාවක් දැම්මෙමි.පොඩි පහේ මනමාල හිනාවක්
”ඔයා කරන්නේ බයෝද, මැත්ස් ද?”
“මැත්ස්, ඔයා කරන්නෙත් මැත්ස් මයි නේද? මම දැකල තියෙනවා ඔයා පයිතගරස් සර් ගේ ක්ලාස් එනවා”


කෙල්ලත් පොටකට එන පාටය. අද කොල්ලාගේ වෙලාව හිතපු තරම්ම නරක නැත
“ඔව් ඔව්. ඒත් මට නම් ඔයාව දැකල පුරුදු ආකීමෙඩිස් ගේ පිසික්ස් ක්ලාස් එකේදී විතරනේ”
නැවතත් අර හිනාව. මාව දිව්‍යලෝකෙට අරන් යන හිනාව


“ඔයා හැමදාම බස් එකෙන් වැටෙන්න යනවද?”
පුදන කොටම කාපි යකා කියන්නේ මෙහෙම වෙලාවල් වලටය. මේකිත් එසේ මෙසේ බඩුවක් නොවෙන හැඩය. අහිංසක පාටට හිටියාට බෙල්ලෙන්ම කපන හැටි දනී.
මම අහිංසකව සිනාසුනෙමි. “කොන්දොස්තරගේ කකුල පැටලුනානේ, ඒකයි..”
“ඉතින් ඔච්චර හදිස්සියේ පනින්න ගියේ ඇයි?”
” මට සමනල එකට යන්න ඕනේ. ඒක එකටද කොහෙද වහනවා නේද අද? “


ඈ සිය වමත ඔසවා වෙලාව බැලුවාය. “හයියෝ .. දැන් එකට පහයි. ඔයාට පරක්කකුයි නේද? දුවල ගියොත් නම් වහන්න කලින් යන්න පුළුවන් වෙයි”
ඉතින් මම හරියට ඇගෙන් සමු නොගෙනම.. ලොකු හදිස්සියකින් වගේ යන්නම් කියාගෙන, අප ඉදිරියේ දිස්වුනු සමනල පොත්හල වෙත ඉගිලී ගියෙමි. මෙච්චර හොඳට කතා කර කර ආපු ගමන කොහෙවත් නැති සමනල එකෙන් ඉවර කිරීමට සිදුවීම ගැන මට තදබල කනගාටුවක් ඇතිවිය. නමුත් බලාගෙන යනවිට මේ ඇතිය. කොෆි ෂොප් එකකට ගොස් චොක්ලට් කෝපි එකක් බොන ගමන් තව දුරටත් කතා කර කර ඉන්න තිබුනානම් හොඳය. නමුත් ඒවා වෙන්නේ හින්දි චිත්රපට වලය. මේ හින්දි චිත්‍රපටයක් නොවන හෙයින්ද, මීගමුවේ එවකට හොඳ කොෆි ෂොප් එකක් නොතිබූ හෙයින්ද ඒ හොඳටම ඇතිය.


පසු සටහන: හිතාමතාම රොටියා විසින් පුද්ගල හා ස්ථාන නාම වෙනස් කර ඇති බව සලකන්න.


ලපයා සමග ඉතිරි කොටස ඉක්මනින්

Friday, December 13, 2013

එකෝමත් එක දවසක - 03

නවතා තිබුණු බස් රථයට ගොඩ වෙම්දෝ නොවෙම්දෝ දෙගිඩියාවකින් හිත කොනිති ගැහුවත්, නොදන්නා ගම්පහ නගරයේ රස්තියාදු වෙනවාට වඩා දන්නා මීගමුවට ඇවිත් රස්තියාදු වීම වඩා හොඳ යයි මට සිතුනේය. ඒ නිසා මම බස් රථයට ගොඩවී කවුළුව අසල අසුනකට පිට දුන්නෙමි.
නවතා තිබූ බස් රථය ඇද්දුවාද නැද්දැයි වගක් නැතිව මම කල්පනා සාගරයක ගිලී සිටියෙමි. මොළය කවදාවත්ම නොකරපු විදියට වෙහෙස කොට සිතුවද පොරක් වීමට තරම් සුදුසු කමක් මා තුල මටම සොයාගත නොහැකි විය.
කියවන ඔබත් මීට දශක බාගයකයට හෝ දශකයකට පමණ පෙර ඒලෙවෙල් පන්තියේ සිටියානම් , එදවස ජංගම දුරකතනයක් යනු කොපමණ සුඛෝපබෝගී මෙවලමක් දැයි මතක ඇතුවා නිසැකය. විශේෂයෙන්ම අප වගේ සාමාන්යම පන්තියේ මාපියන් ඇති කොල්ලන්ට.
ඉතින් මගේ හිතට කල්පනා වූ පළමු සිතිවිල්ල නම් ජංගම දුරකතනයක් ගෙන ඈට පෙනෙන්නට වැඩකෑලි ටිකක් දැම්මොත් ඈ මට කැමති වනු ඇති බවයි. මොකද ඒවන විට මගේ ප්‍රතිවාදියා සතුව අරින වහන වර්ගයේ ජන්ගමයෙක් තිබුණු අතර ඌ විනෝදාංශයක් ලෙස ඒකෙන් වැඩකෑලි දැම්මේය. නමුත් මගේ යාලුවෙක් ළඟ පමණක් නොව මගේ දෙමව්පියන් ළඟවත් ජන්ගමයෙක් නොතිබුණු නිසා ඒ සිතුවිල්ල ලත් තැනම ලොප් විය. ඊළඟ සිතුවිල්ල ඌත් සමග ගේම ඉල්ලා ගෑණු ළමයාට පේන්නට ඌට නෙළීමයි. නමුත් මම ගුටි කන්නට බයය. මා ඌට නෙලනකන් ඌ අකුලාගෙන හිදිවියයි විස්වාස නැති නිසා එයද ලොප් විය.
එවෙලෙහි මගේ හිතට නැගුනු මෙවැනි වීරක්‍රියා එකින් එක ලියන්නට ගියොත් මට කොටස් දෙක තුනක්ම ඒවාම ලිය ලිය ඉන්න සිද්ද වෙනු ඇත. කෙසේ හෝ එදා කාලෙකට පසු මොළය දරුණු විදියට වෙහෙසෙවූ නිසා මට එහෙම්ම නින්ද ගියේය. ඇහැ ඇරුනේ මීගමුව බස් නැවතුම ඔන්න මෙන්න තිබියදීය.
හිස පුරා හිසරදයක් තිබුනද මා අඩියට දෙකට බස් රියේ දොරටුව වෙත පැන ගියෙමි. කොන්දා හිටියේ දොරේය. ඌද කොල්ලෙකි. ඌ පාපුවරුවේ යටම පඩියේ එක කකුලක් දොර හරස් කරගෙන තියාගෙන හැඩ වැඩ දා හිටගෙන  සිටියේය. තව ඇත්තේ විනාඩි දෙකක ගමනකි. මා මගේ පිටුපස බැලුවේ නිකමට මෙන් කෙල්ලෙක් හිටියොත් ඇහැක් දාන්නටය. දුටු දර්ශනයෙන් මගේ දෙපතුල් සිතල වී දෙපා ගැහෙන්නට පටන් ගත්තේය. මෙන්න මගේ දිව්‍යන්ගනාව මගේ පිටිපස්සෙන් හිටගෙන...
ඔලුව කැක්කුම නිසා පෙනුණු මායා දසුනක් යයි සිතා මා ඇය දුටු සැනින් ඉදිරිපස බලා නැවත පිටුපස හැරී බැලුවෙමි. මෙන්න ඈ එතනම. මා බලන බව දුටු ඈ මා සමග සිනා වෙන්න කට හදනවාය.. මලලසේකරය.. මගේ මුණ ගල්වී වගේය. පිළිතුරු හිනාවක් පළකිරීමට කොපමණ උත්සහ කලද මගේ කට දෙපැත්ත හිරිවැටිලාය. මා යලිත් ඉදිරිපස බලා කොන්දා සමග පෙරහුරු හිනාවක් උත්සහ කලද එයද අල විය. කෙහෙල්මල.. මොකද්ද මලහත්තිලව්වේ මගේ මුණට වෙලා තියෙන්නේ...
අන්තිමේ මා තීරණය කළේ ඇයට පේන්නට බස් රියෙන් වැඩදාගෙන පනින්නටය. බස් රිය නවත්තන්නට පෙර, ලොකු හදිස්සියකින් වගේ පනින්නටය. හරියට ටාසන් වගේය. එතකොට මාද නිකන්ම නිකන් කොල්ලෙකු නොවන බව ඇයට වැටහෙනු ඇත. බය නැති කොල්ලෙක්..
බස් රිය නවත්තන්නට ඔන්න මෙන්න තිබියදී පපුව පුම්බා, බහිනවා යයි කොන්දාට පවසන ගමන්ම රියෙන් පැන්නෙමි. කාලකන්ණි කොන්දා උගේ කකුල දොර හරස් කරගෙන හිටි බව කල්පනා නොවුනේ මගේම ගොන් කමටය. ටාසන් පැනිල්ල කෙසේවෙතත් හොම්බෙන් යාමට ඔන්න මෙන්න ගොස් අනු නාමයෙන් බේරුනෙමි. නහය බිම වැදුණු නොවැදුණු ගානය. කොන්දා ඩ්ර්යිවර් සමග නසරානි කොල්ලන්ගේ රැස් බහින්නට උන්ගේ අඬු කැඩිය යුතු බව ට පලි ගසනවා මට හීනෙන් මෙන් ඇසුණු අතර මගේ දිව්‍යන්ගනා තොමෝ නක්කල් හිනාවක් දමාගෙන මා පසු කරගෙන ගියාය.

                                  



ඉතිරි කොටස ඉකමනින්

Thursday, December 12, 2013

එකෝමත් එක දවසක -02

උදේ හතරහමාරේ සිට අඩව් අල්ලන්න සිද්ද වෙන, තවත් මුස්පේන්තු දවසකට ඉර උදාවී ඇත්තේය. වෙනත් වචන වලින් කියහොත්, අද උදේ හයහමාරේ සිට හැන්දෑවේ පහ වන තෙක් මට ක්ලාස් ඇත්තේය. මෙවැනි මුස්පේන්තු දවස් සුන්දර කරන එකම එක සිතිවිල්ල නම් ඇය ය. ඒලෙවෙල් කෙහෙල්මල නිසා අල වී ඇති මගේ ජීවිතයේ ඇති එකම ආලෝකය ඇයය.
වැඩිහිටින්ට නම් තියෙන්නේ ක්ලාස් පලයන්, පාඩම් කරපන්, මනමාල කම තියල ඉගෙන ගෙන ඉඳින් වැනි උදාන වාක්ය, දවසට තුන් හතර සැරයක් අපට දේසනා කිරීම පමණකි. ක්ලාස් වල වරු ගණන් වාඩි වී හිඳගෙන ඉගෙන ගැනීමේ රඟ දන්නේ අපිය. මෙවැනි විටෙක කෙල්ලෙන් යන මාතෘකාව, නිරුදකයකට වට දිය බිඳක් වාගේ සිත් පුබුදුවාලයි. හරියට නෙස්ටමෝල්ට් දැන්වීම වගේය. ‘දවස පුරා ප්‍රබෝධයෙන්...’
ඉතින් මම පන්තියේ ඇයව පෙනෙන මුල්ලක වාඩි වෙමි. මගේ පරිවාර රැලද මාගේ එම බංකුවෙන්ම හිඳ ගනිති. උන් කීප දෙනෙක්ද ඇගේ මිතුරියන් කීප දෙනෙකුට පැණි හලන නිසා මට උන්ගේ කටවල් වලින් බේරී මගේ අසුන තෝරා ගත හැක.
මට ඇයව පෙනෙන්නේ දෙව්දුවක් මෙනි. ඇය සුදු නිසා මට වෙන මුකුත් ඕනෑ නැත, ඇය දෙස ඕනෑ තරම් වේලා බලන් සිටිය හැක. ඇටකටුස් නම් කියන්නේ මගේ ජාන විකුර්තියක් කියාය. උගේම වචන වලින් කියනවා නම් ‘ කැරපොතු සුද ලස්සනයි කියන්න මට මෝල් වන්නට ඕනෑය’. මගේ තේරීම ඌට අදාළ නැති බව එදා මම ඌට සුද්ද සිංහලෙන්ම තේරුම් කලෙමි. ( මේ ඊයේ පෙරදා දවසක ඌ මුණගැසුණු වෙලාවක ඌ ඔය කතාව මතක් කළේ මගේ වර්තමාන පෙම්වතිය ඉදිරිපිටදිමය. උගේ හොක්ක තැලීමට පැමිණි අසීමිත ආසාව, රැවුමකින් පමණක් පිට කරන්න මට සිද්ද උනාය.මගේ පෙම්වතිය මගේ සකල අතීතය ගැන හොඳ අවබෝදයකින් යුතු නිසා, ඌත් සමග එකතු වී මට කොලොප්පන් කළා මිසෙක මාත් එක්ක හොට දික් කරගෙන හිටියේ නැත)
යාන්ත්‍ර විද්‍යාවට හසුවී තැලී පොඩිවී යන ජීවිත ආසාව නැවත ඇතිවී එන්නේ ඈ නිසාය. දැනට මම ඈ ගැන දැන ගත යුතු සියල්ල සොයාගෙන අවසන්ය. ඉන්න තැන, යන පාසැල, ආසම විෂය, කොල්ලෙක් දැනට නැත ඉස්සර ඉඳ ඇත. විශේෂයෙන් ඇය දරුණු නැති බව. උත්සහ කලොත් ප්‍රතිචාරයක් ලබා ගත හැක .


ජීවිතේ කිසිම දාක කෙල්ලෙක් සමග ආදරය කිරීමේ අදහසකින් කතා නොකළ තිබූ මට, ඇය සමග කතා කිරීමට ධෙර්යයක් නැත. ක්ලාස් ඒමට උදේ නැගිට දත් මදින අතරේ, හැමදාම මෙන් මම ‘අද නම් කතා කරනවාමයි’ කියා සිතා ගත්තත් ඇයව දුටු කල මගේ සියලුම ශක්තිය සිඳී බිඳී යයි. ‘ඒකිව දැක්කම උඹේ ටෙස්ටොස්ටෙරෝන්, ඊස්ට්‍රජන්න් වෙනවා ඇතැයි’ මට කීවේ බයෝ කරන බකයාය. ඈ ගැන සිතමින් දැනට මම මාස තුනක් නාස්ති කර ඇත.
ඈ ගැන තව අසමජ්ජාති කොල්ලෙකු ඉන්ටෙරෙස්ට් වී ඇතිබව හෙන ගහන්නා සේ මට අහන්නට ලැබුනේ පන්තියේ විවේක කාලයේදීය. ඌ මං මෙන් නොව කොන්ද පණ ඇති එකෙකි. ඒ කෙසේද යත් පෙර ඌ කෙල්ලන් දෙතුන් දෙනෙකු සමගම කොක්ක දාගෙන සිට ඇත. අනික ඌ හොඳ පෙනුමය. මට වගේ වලස් පෙනුමක් නැති ඌ දෙස කෙල්ලන් සූ ගාමින් බලන අයුරු මම මගේ ඇස් දෙකින් දැක ඇත්තෙමි. එබැවින් වර්තමාන තත්වය යටතේ හඳට යන්න ඕනෑ වූ හාවෙකුට තරන් වත් අවස්තාවක් මට නැති බව මටම තේරුණේය.
එදා හවස පන්තියේ ඉන්නට හිත හදා ගැනීමට මට කොහොමටවත්ම නොහැකි වුයේය. මගේ මිතුරු රැලට දැනගන්න ලැබුනොත් කෙසේවත් මට ක්ලාස් කට් කරන්නට ඉඩ නොදෙන නිසා විවේක කාලයෙන් අනතුරුව, සියලු දෙනාගේම ඇස් වසා මම පන්තියෙන් පැන්නෙමි.
ඔලුව කරකුට්ටන් වී, මා ගැනම උපන් ආත්ම අනුකම්පාවෙන් යුතුව මම බස් නැවතුම කරා පිය මැන්නෙමි. මගේ වෙලාවට බසයක් නැවතුමේම නවතා තිබුනේය. 





තවත් කොටසක් ඉක්මනින්


Monday, December 9, 2013

එකෝමත් එක දවසක -01

මගේ හිතට හරිම නැත. ගෑණු ගැන පුදුමාකාර වූ කලකිරීමක් හිත පුරා නලියයි. අවුරුද්දක් , දෙකක්, තුනක් නම් කමක් නැත කියා හිත හදා ගත හැක. ඒත් ඒලෙවෙල් මුල් අවුරුද්දේ සිට, කැම්පස් අවසාන අවුරුද්ද තෙක් මා මගේ යයි හිතා හිටි කෙල්ල , දැන් වෙන බයිලාවක් දොඩවන විට මට ඔක්කාරෙට එයි. ඊළඟට ඒ ගැන අවුරුදු හයකට වැඩි කාලයක් නාස්ති කල මා ගැන හිතන විට, මාගේම බෙල්ල මිරිකා දැමීමට තරම් කෝපයක් මා ගැනම ඇතිවේ.

කැම්පස් එකේ මා දෙස බලමින් මදහස පෑ, මගේ හිතේද පොඩි මනමාලකමක් තිබූ, ඒත් මේ මල හොන්තුව නිසා ඒ හැඟීම් ලත් තැනම ලොප් කර දැමූ, නංගිලා කීප දෙනා ගැන සිහිවෙන විට මට හද පලාගෙන මහා ශෝකයක් දැනේ. කවදා හෝ මේ සමයම මා හැර යන බවට කල්තියා අනාවැකි පල කල මගේ හිතාදර ගෙමා හා ලපයා සිහිවන විට, උන් දෙදෙනාගේ කටට මසුරම බැගින් දමන්නට හිතේ.

ඒලෙවල් කාලේ පොත්ත ටිකක් පාට කෙල්ලෙකු සොයා ගැනීම කළුනික හොයනවා සේම අමාරුය. ටිකක් සුදුවට ඉන්න කෙල්ලන් දෙතුන් දෙනා කොල්ලන් වූ අපිට රන් හා සමානය. ඒලෙවල් පන්තියේ ඉන්න කෙල්ලන් බහුතරයක් අව්වට වේලි, වැස්සට තෙමි, රෑ නිදිමරා යකා සේ පේන බවත්, උන් කැම්පස් ගොස්, රස්සාවකට යන කල අළු ගසා දමා පට්ට කෑලි බවට හැව අරින වග වැටහෙද්දී අප බොහෝ සෙයින් ප්රමාද වැඩිය.

පෙර කරුමයකට ඉස්සර මගේ හිත යන්නේම සුදු කෙල්ලන්ටය. මගේ මුණට ඇස් පෙනෙන කෙල්ලෙකු කැමති නොවන බව දැන දැනම මා පැණි පෙරන්නේ සුදු කෙල්ලන්ටය. ඒ ඉස්සරය.ඕනෑම පාටක කෙල්ලෙකු ගේ සැබෑ ලස්සන පෙනෙන්නේ දැන්ය. ඒවාට මොලේ දියුණු වන්නට ඕනෑය. අනික ලෝක රූරැජින උනත් හිත සවුත්තු නම් ඒ කෙල්ල ගෙන් වැඩක් නැත. කොල්ලන්ටත් මේවා අදාලය. ඒත් මම අහවල් එකෙක් නොවෙන නිසා මගේ හිත යන්නේ කෙල්ලන්ටය. ඒ නිසා මම කතා කරන්නේ කෙල්ලන් ගැනය. මිදී ඇඹුල් කී නරියා සේ නොව මම ගෑණු ළමයින්ගේ හොඳ සහ නරක දෙකම දකිනවාය. ඒ නිසා ගෑණු ළමෝ මට බැන වැදීමට ඉක්මන් නොවෙන ලෙස දන්වනවාය.

මා ලියන්නේ මට සිද්ද වූ දෙයය.මා කවුදැයි අනුමාන කරන්නට නොයන ලෙසද, අරූ වෙන්න ඇති මූ වෙන්න ඇතියි කියමින් අරූට මුට හිංසා නොකරන ලෙසද කියවන ඔබෙන් ඉල්ලා සිටිනවාය. කොහොමත් මා ලියන කතා කියවන්නේ අතලොස්සක් නිසා මා කවුදැයි අනාවරණය වීමේ බයක් නම් නැත.
ඉතින් එකෝමත් එක දවසක ගම්පහ ටියුෂන් පන්තියේදී මට අනංගයාගේ මල් හීසර වැදුණු වෙලාවේ සිට මම මගේ කතාව ලියන්නට පටන් ගනිමි.

ඊ ළඟ කොටස ඉක්මනින්ම බලාපොරොත්තු වන්න


Friday, December 6, 2013

රොටියා සහ සියල්ල දත් ගෑණු ළමයි

මේ ඊයේ පෙරේදා රොටියාට කාලෙකින් නොකෑ විදියේ කට්ටක් සෙට් වෙන්නට ගොස් අනුනමයෙන් ගැලවුනේ රොටියාගේම මොළයට පින් සිද්ද වෙන්නටය. විය යුතු පරිදිම අනිත් එව්වන් පිළිගෙන ඇත්තේ ඒ කතාවේ ෆිමේල් වර්ෂන් එක නොහොත් රොටියාගේ ගෑණු ළමයා කියන කතාව නොහොත් ඇගේ කල්පනාව හොඳ නිසා වැඩේ ගොඩ ගිය වගය. කතාව සාරංශයෙන් පහත දක්වා ඇත්තාය.
රොටියාගේ ගෑණු ළමයාගෙන් ලැබුණු තර්ජනයකට අනුව පසුගිය දිනෙක රොටියා හාෆ් ඩේ එකක්ද දමා ඇයව ගන්නට එන්නට සිදු උනේය. ඇගේ කොම්පැනි ලොක්කා, උගේ කොම්පැනියේ බිල්ඩිම කොළඹ හද්ද ට්රැෆික් තියෙන මැද්දකම අටවා ගෙන තියෙන නිසා ගෑණු ළමයා ස්ව කැමැත්තෙන්ම රොටියාට පහසු තැනකට එන්නට එකඟ වී සිටියාය.
සියල්ල දන්නවායයි මහත් ලොකුවට සිතා සිටින ඇය පෑලියගොඩ පාලමේ සිට කීරුලපන දක්වා මුළු මහත් වපසරියම හඳුන්වන්නේ කොළඹ කියාය. කොළඹ අතන කලර් ලයිට්, මෙතන බෝ ගහ, අර බස් නවත්තන තැන, ඇයි අනේ හයි වේ බස් පාරට දාන තැන, ආදී වශයෙන් ඇය ඇයටම සුවිශේෂ වූ ආකාරකට මුළු කොළඹම හඳුන්වන අතර, ඒ තැන් දැන නොගැනීම ගැන රොටියාට බැනවදින්නේ උදේ හවස කොළඹ ගියාට, කොළඹ හරියට තාම දන්නේ නෑ කියාය.

රොටියා බලාපොරොත්තුව සිටි දුරකථන ඇමතුම දහවල් දොළහමාරට පමණ ජන්ගමයාට අවාය,
ගෑණු ළමයා: රොටියා මං කරගම්පිටියට එනවා මාව ගන්න ඉන්න.
රොටියා: කොහාට?
ගෑණු ළමයා: කරගම්පිටියට කරගම්පිටියට. ඇයි අනේ ඔයා කරගම්පිටිය දන්නේ නැද්ද. අර එදා අපිව පොලිසියෙන් ඇල්ලුවේ
රොටියා: මොකක්?
ගෑණු ළමයා: අර එදා ඔයා ට්රැෆික් ලයිට් වලට නවත්තනේ නැතුව ගිය හින්ද ඇල්ලුවේ.. මතක නැද්ද අනේ. ඔන්න එන්න වෙලාවට. මං තියෙනවා
රොටියා මොලය අනික් පැත්තට කරකවා කල්පනා කලද ඔය කියන අටමගල් කරගම්පිටියේ කලර් ලයිට් ගැන රොටියාගේ මතකයට ආවේ නැත. අනික ඔය කියන වෙලාවට නුගේගොඩ මැද්දෑවට යෑම රථ ගාලකට යාමක් වැනිය. නැවතී සිටීමක් මිස ගමන් කිරීමක් නම් නැත. ඔය ඔක්කොටම වඩා රොටියා හා ගෑණු ළමයාට යාමට ඕනෑ වී තිබුනේ ආමර් වීදිය පැත්තටය
දෙයියෝ රොටියාට මොළය කලඳක් දී තිබූ නිසා රොටියා කරගම්පිටිය පැත්තට පාගන්න ඉක්මන් නොවුනාය රොටියාව අනන්ත වාරයකදී පොලිසියෙන් අල්ලා ඇති බැවින් ඔය කලර් ලයිට් එකක්ද මතකයට නොආ මුත්, පෙර උගත් පාඩම් ඇසුරෙන් ගෑණු ළමයා ඔය දොඩවන්නේ කරගම්පිටියක් ගැන නම් නොවන බව රොටියාට ඉස්තිරෙටම කල්පනා උනාය.
අවසානයේ කැම්පස් එකේදී ඉගෙන ගත් පාඩමක් ඇසුරෙන් රොටියා සිද්දියෙන් විය නොහැකි සියලුම සිද්දීන් ඉවත් කල පසු ඉතුරු වුයේ හෙට්ටියාවත්තය. ඒබැවින් කෝකටත් කියා ආමර් විදිය පැත්තට බර වෙන්න ඉඩ ඇති තැනක රොටියා නැංගුරම් ලා ඉන්න තුර ගෑණු ළමයාගෙන් දෙවැනි කෝල් එක ආවාය
ගෑණු ළමයා: මේ රොටියා මං හොඳ වෙලාවට කලින් ටිකට් ගත්තේ
රොටියා: ඇයි?
ගෑණු ළමයා: බස් එකේ ගහල තිබ්බේ කරගම්පිටිය හෙට්ටියාවත්ත කියලනේ. මං කරගම්පිටියට ටිකට් ඉල්ලුවාම කොන්දොස්තර කිව්වනේ එහේ යන්නේ නෑ මේක යන්නේ හෙට්ටියාවත්තට කියල.. (පෙර වාසනාවකට ඇය යා යුතු දිසාව දනී)
රොටියා: ආ මාර වැඩේ නේද?
ගෑණු ළමයා: ඒක තමා. බලන්නකෝ මං කල්පනා කරලා කලින් ටිකට් ගත්තේ නැත්තන් වෙන දේ. ඔයා වැරදිලා යනවනේ කරගම්පිටියට. මාත් ඔයා වගේ උනා නං ඔහේ යයි බස් එකේ කොන්දොස්තර ටිකට් ගන්න කියනකන්. බලන්න මං කල්පනා කරලා වැඩ කරන හින්ද හොඳයි........!!!
බොහෝ ගෑණු හිතා ඉන්නේ තමුන් ඔක්කෝම දන්නවා කියාය. අහිංසක පිරිමි අපි නැතිවූ දවසට ඒ දැන ගැනිල්ලේ තරම බලා ගත හැක්කේය


Saturday, November 30, 2013

මම මිනිසෙක්මි


පොඩිකාලේ මගේ ඇඟිල්ල කැපුනාම මම කෑ ගහල ඇඬුවා. ඊයේ පෙරේදා ආයේ ඇඟිල්ල කැපුනාම ඇඬුවේ නැති උනාට මට හොඳටම රිදුනා. .....උඹටත් එහෙමම නේද? අර අහිංසක අම්මයි දුවයි මන්නෙන් කොටලා මරන්න කලින් හිතුනේ නැද්ද ඒත් ලේ වලින් මස් වලින් හැදුන මිනිස්සු කියල. මන්නේට කැපෙන්නේ පණ තියෙන මිනිහෙක් කියල උඹට හිතුනේ නැද්ද? කියපන් මට හොඳට හිතල බලල


පොඩි ළමයින්ගේ ලෝකේ වීරයෝ උන්ගේ අම්මල තාත්තල. උඹ තාත්ත කෙනෙක් නං උඹ කැමති නෑ නේද කවුරු හරි උඹේ පොඩි එකා ඉස්සරහ උඹට බනිනවට ගහනවට.....එහෙව් උඹ අවුරුදු හය හතක වෙච්ච පොඩි එකෙක් ඉස්සරහා උගේ අම්මයි තාත්තයි ගහල මැරුවේ මොන හිතකින්ද? උඹට මතක් උනේ නැද්ද උඹේ පොඩි එකාව? කියපන් මට හොඳට හිතල බලල


කඩදාසි කොලයක් ගින්දරට දාල බලන් ඉඳල තියෙනවද උඹ? පොලිතින් කොලයක් පිච්චෙනවා උඹ දැකල තියෙනවද? කවදාහරි දවසක උඹව පිච්චිලා තියෙනවද? පිච්චේද්දී උඹට දැනුනු වේදනාව මතකද උඹට.....එහෙව් උඹ, උඹේම ලෙයින් හැදුනු ළමයි දෙන්නවයි, උඹේම ගෑනිවයි පුච්චලා මැරුවේ මොන හිතකින්ද.. කියපන් මට හොඳට හිතල බලල


දවසක තැලිලා තියනවද උඹේ ඇඟිල්ලක් ගලකට? දන්නවද උඹ ගලකට තලෙද්දී දැනෙන වේදනාව? දවස් ගාණකට ඒක හොඳ උනේ නෑ නේද?....එහෙව් උඹ ගල්වලින් ගහල ගෑනියෙක්ව මරන්න හිත හදා ගත්තේ කොහොමද? උඹ පවක් කළා කියල උඹ කැමතිද ගල් වලින් ගහල මරනවට. කියපන් මට හොඳට හිතල බලල
බෙල්ල කපල මරද්දී වේදනාවක් දැනෙන්නේ නෑ කියල කියන උඹ කැමතිද උඹේ බෙල්ල කපල මරනවට. කියපන් මට හොඳට හිතල බලල


මේ ලඟදි එක අහිංසක ගෑණු ළමයෙක්ගේ බෙල්ල කපල මැරුවා කියල අහපු හැමෝගෙම ඇස වල කඳුළු පිරුනා තමයි. උඹත් ඒක අහල හරිම ජාතිවාදියෙක් උනානේ. මතකද උඹට...එක ආගමකට පලු යන්න බැන බැන මුළු ඉරිදා දවසම ෆේස් බුක් එකට ලියුං ලියපු උඹ ඉරිදාම උදේ එකොළහට විතර මස් කඩේට ගිහින් හරක් මස් රාත්තලයි, කුකුල් මස් රාත්තල් දෙකකුයි ගෙනාව මතකද? උඹ ඒ ගෙනාවේ ඉබේ මැරිච්ච සත්තුන්ගේ මස්ද? උන්ව මැරුවෙත් බෙලි කපලම නේද?....දස වද විදගෙන මැරෙන සතෙක්ගේ මස් කකා කොහොමද උඹ සාදරණේ ගැන කතා කරන්නේ. කියපන් මට හොඳට හිතල බලල


උඹේ පඩි පැකට් එක නැති උනොත් කොහොමද? මොනාද උඹට හිතෙන්නේ. උඹ කොහොමද ඒ මාසේ ගෙවාගන්නේ?.....එහෙව් උඹ නේද ජාතිවාදේ පිටින් දාල වෙන ජාතියක කියන මිනිහෙක්ගේ මුළු සේසතම කොල්ල කෑවේ. ඌ ඊළඟට මොනවා කරන්නද කියල උඹට හිතුනෙම නැද්ද? කියපන් මට හොඳට හිතල බලල


උඹ කියනවා උඹ කන්නේ කැපකරපු කෑම විතරයි කියල. එතකොට උඹ හුස්ම ගන්නේ කැප කරපු වාතේ විතරද? නොදන්න නිසයි මං අහන්නේ? කියපන් මට හොඳට හිතල බලල


උඹ දැන් හරිම අගම්වාදියෙක් වෙලානේ. මට ආඩම්බරයි උඹ ගැන. උඹ හැමෝම වෙනුවෙන්ලුනේ නැගී හිටින්නේ. උඹත් එක්ක එකට වැඩ කරන එකාගේ ආගම තහනං කරන්න කියලනේ උඹ කෑ ගහන්නේ. උඹ අන්තිමට පන්සලට, පල්ලියට ගියේ කවදද. කියපන් මට හොඳට හිතල බලල


උපන්දා ඉඳලම උඹ හිටියේ පිටරටනේ. උඹ අන්තිම හොඳට ෆැසිලිටිස් එක්කනේ හැදුනේ. උඹ කතා කරන්නේ මිනිස්සු වෙනුවෙන්නේ.....එහෙව් උඹ දන්නවද ලංකාවේ ඉස්සර එකම ඔෆිස් එකේ වැඩකරන අම්මයි තාත්තයි වැඩට යන්නේ බස් දෙකක බව. ඒ උන්ට මගුල් නටන්න නෙවෙයි. අම්මයි තාත්තයි දෙන්නම එකටම බෝම්බෙකට අහුවෙලා , මැරිලා ළමයි අසරණ වෙන එකේ සම්බවිතවාය බාගෙකට අඩු කරන්න. උඹ දන්නවද ඉස්කෝලේ යන ගමන් බෝම්බ වලට අහුවෙලාමැරිච්ච ළමයි ගැන හිත හිත අම්මල, තාත්තල තාම විදෝන බව, දැන් ලංකාවේ මිනිස්සු බය නැතුව හුස්ම ගන්න බව. උඹේ රටට හදිස්සියේ බෝම්බ දැම්මොත් උඹත් කතා කරන්නේ සාමෙටමද? අනේ මට තේරෙන්නේ නැති හින්දයි අහන්නේ. කියපන් මට හොඳට හිතල බලලා


මට දුකයි උඹ ගැන. උඹ තට්ටු කරලා අහපන් උඹේ හිතෙන්. හිතටත් දුක ඇති උඹ ගැන. උඹ මිනිහෙක්.. අන්න ඒක තේරුං ගනින්. උඹ ජාතියක් ආගමක් කුලයක් ඉපදෙද්දී අරන් ආවේ නෑ. ඒවා උඹට පටෝපුවා. හිතපන් උඹ, උඹ විදිහට. කාගෙවත් බළල් අතක් නොවී හදවතට එකගව මිනිහෙක් වෙයන්. පුලුවන්ද උඹට? හැමෝම උඹ වගේමයි. බැහැල බලපන් උගේ සපත්තුවට. ඌත් උඹ වගේමයි.... නැද්ද? කියපන් මට හොඳට හිතල බලල


Tuesday, November 26, 2013

ගෑණු ගෑණු, පිරිමි පිරිමි සහ ගෑණු පිරිමි

කොම්පැණියේ වැඩක් ගෑණු දෙන්නෙක්ට පංගාර්තු වී ඇත්තාය
1 ඒකීය: (හිතයි) අපෝ මම කොහොමද මෙයත් එක්ක වැඩ කරන්නේ? ඔක්කොම මට තමයි අප්පා කරන්න වෙන්නේ. ලකුණු ටික ඔක්කොම එයා දාගනියි. හැමදාම උනේ එකනේ
2. ඒකීය: (බෝයිෆ්රෙන්ඩ් ට කියයි) බලන්නකෝ අනේ. මට හිතා ගන්න බැ මොනවා කරන්නද කියල. එයා උඩින් හිනා උනාට යටින් මාත් එක්ක හරී...ම ඊරිසියයි.. ( සෙමෙන් අඬයි) බොස් හිතලමයි ඕක කලේ. ඇයි අරකි යනවනේ කරේ .. (දත්කුරු සපයි) ..
වැඩේ ඉවර වෙනතුරු දෙන්නා කපන්න බැරි අත් ඉඹින්නා සේ වැඩ කරති. අවසානයේ පන යන්න හෙම්බත් වී ඇත්තේ අර අහක හිටපු අසරණ කොල්ලාය (2 එකියගේ බෝයිෆ්රෙන්ඩ්)

කොම්පැණියේ වැඩක් පිරිමි දෙන්නෙකුට පංගාර්තු වී ඇත්තාය
1 එකා: ආඅ මචං.... අන්තිමට උඹත් ආව නේද කොල්ලත් එක්ක වැඩකට සෙට් වෙන්න..
2 එකා: පල පල තෝ ලොක්කට කියල නේද මං වගේ සුපිරි කොල්ලෙක් එක්ක වැඩක් ඉල්ල ගත්තේ
දෙදෙනා කරට අත දා ගනිති. අනතුරුව වැඩේට පෙර මොනවහරි කන්න යති

කොම්පැණියේ වැඩක් ගෑණු කෙනෙක් හා පිරිමි කෙනෙකුට පංගාර්තු වී ඇත
1 ඒකීය: හී හී හී.... අපි දැන්ම වැඩේ පටන් ගන්නවද... හී හී හී (කොල්ලා දෙසට විරිත්තාගෙන සිටියි)
1 එකා: ඔයා ට පුළුවන් වෙලාවක පටන් ගමු
1 ඒකීය: ( හිතයි: ඒ මොකද්ද එයා කිව්වේ. කොහොමත් ඕකා මට ලයින්) හී හී හී එන්න එපා ඕවට (තොල් උල් කර) වැඩේ නං වැඩේ
1 එකා: (ඒ හරුපේ වටහා ගත නොහැකිව උඩ බිම බලයි) ඒකම තමා මාත් කිව්වේ..
දෙදෙනා සහයෝගයෙන් වැඩේ කරති. කොල්ලා තමා සමග වැඩ කරන්නේ කෙල්ලෙක් නිසා ෆෝර්ම් වී ඇත. ඒ ෆෝර්ම් වීම කොල්ලෝ උපතින්ම රැගෙන එති. කෙල්ල, කොල්ලා ලෝකයේ ඉන්න සියලුම කෙල්ලන් අතරින් තමන්ට ලයින් බව හිතාගෙන ෆෝර්ම් වී ඇත.

රොටියාගේ පසුවදන
කෙල්ලන් සමග වැඩ කිරීම හැමවෙලේම ආතල් ම ආතල්ය. උන් කොල්ලන් මෙන් නොවහැමවෙලේම චිකි චිකි ගාති. කොල්ලෙක්ට කෑමක් දැක්කොත් ඌ දුවගොස් ගොඩම බදාගනියි. කෙල්ලන් එසේ නැත. උන් අපිට එක්ක කෑම ගෙනෙති. පැයබාගයකට සැරයක් වොෂ් රූම් ගොස් පැයකාලක් ගතකර මල් මෙන් හිනැහී හිනැහී එති. කොල්ලන් වූ අප උපතින්ම ගෙනා කුකුල් කම නිසා කෙල්ලන්ගේ හිනාවෙන් මන්මත් වී කෙල්ලන්ගේ වැඩත් එක්ක ඔක්කොම වැඩ ටික 
ඉවර කරන්නෙමු
                                                          

Sunday, November 24, 2013

නොවැම්බර් 24


“කොහෙද ඉන්නේ”
“ලෙක්චර් එකක”
“කීයටද බ්රේක් එක”
“දහයමාරට”
“ගන්නවද මට”
“..හා”
මම හේතුවක් කිව්වෙත් නෑ. එයා හේතුවක් ඇහුවෙත් නෑ. පිරිමි ළමයෙක්ට හැමවෙලේම මතක් වෙන ගෑණු ළමයෙකුට කතා කරන්න හිතෙන එකේ වැරද්දක් තියෙනවද? විශේෂයෙන්ම ඒ ගෑණු ළමය තමුන්ට කැමතියි කියල හිතෙනවනම්..
ඒත් ඒක මම දන්නේ නෑනේ. කටහඬ අහල තිබ්බට මම එයාගේ රූපෙවත් දැකල නෑනේ. එයා උසද මිටිද, සුදුද කළුද... ඇයි මම නොදන්න කෙනෙක් ගැන මෙච්චර හිතන්නේ. ගෑණු ළමයින්ගේ අඟලෙන් අඟල වැරද්දක්ම හොයපු මම කවමදාවත් නොදැකපු කෙනෙක් ගැන ඇයි වදවෙන්නේ...
එයා කොහොම කෙනෙක්ද?.... මාත් එක්ක කතා කරන්නේ කැමැත්තෙන්ද?... මාව මුණගැහෙන්න එයා කැමති වෙයිද?...
ලොකුම ප්‍රශ්නේ...
ඒ කවදද?........




Saturday, November 23, 2013

නොවැම්බර් 23


හඳ දකින දකින වාරයක් ගානේ මගේ හිතට නුහුරු තිගැස්මක් දැනෙනවා. හැමදාම එහෙමයි... ඒ වගේම මූද දකිනකොට, මූදෙ සද්දේ ඇහෙනකොටත් මට ඒ හැගීමම දැනෙනවා. හරියට මම ඔයාව මුලින්ම දැක්ක දවසේ වගේ....


මූද ලස්සනම රෑට. මුදට හඳ එළිය වැටුණාම ඕනේ තරන් වෙලා බලන් ඉන්න පුළුවන්. හරියට මට ඔයා දිහා බලාගෙන ඉද්දි කාලේ අමතක වෙනවා වගේ. මට දැනෙන්නේ ලෝකයම නවතිනවා වගේ. මුළු ලෝකෙම ඔයත් එක්ක නවතිනවා. මම විතරක් ජීවත් වෙනවා. ඔය දිහා බලාගෙන මම ජීවත් වෙනවා......


හඳ එලිය වැටුණු මුදේ රැලි වලට පුළුවන් කෙනෙකුගේ හිතේ තියෙන තනිකම හෝදලා අරින්න. ඇස් ඇඩුවේ නැති උනාට තනිකම දරාගන්න බැරුව අඬන හිත සනසවන්න ඒ රැලි එක්ක එන සුරංගනාවියන්ට පුළුවන්. හරියට ඔයා මගේ ලෝකෙට ආව වගේ....


හඳ එලිය මුදට වැටෙනකොට, ඒ එළියෙන් එන ජීවය උරාගෙන දියකිඳුරියෝ වෙරළට එනවා. පෙනුනේ නැති උනාට, මට ඒ අය කතා කරන සද්දේ ඇහෙනවා. පාලුවෙන් හිටපු ගොඩාක් දවසට මම නින්ද යනකන් ඒ කතා වලට කන් දුන්නා.
දන්නවද එතන හිටියා හඳ එලිය තියෙන දවසට විතරක් ඇවිත් වෙරළට සින්දු කියන කිඳුරියෝ. සමහරු ආවේ පුර හඳ දවසට විතරයි. ඒත් එක දිය කිඳුරියක් හැමදාම ඇවිත් වෙරළට සින්දු කිව්වා. අමාවක දවසටත් කට්ට කරුවලේ ඇවිත් වෙරළට කතා කළා. හරියට ඔයා වගේ. ඔයා මගේ ජිවිතේ පුරාම ජිවත් වෙනවා වගේ. මාව ජිවත් කරන්න හුස්ම පිඹිනවා වගේ. මගේ පණ වගේ.......



Sunday, November 17, 2013

රොටියාගේ බෙස්ට්මන් කතා වස්තුව

රොටියාගේ ෆ්‍රෙඩේක් කසාද බදින්න යනවාය. කසාදය යනු අතේ තියෙන තුට්ටු දෙකට කෙළවෙන කතන්දරයක් බව ද, එම නිසා සඳපානේ හැංගී යාම වඩාත් නුවණැති තීරණයක් බවද අත්දැකීම් ඇත්තෝ අවවාද කලද මූට උවමනා වුයේ මගුලක්මය. ඒ නිසා ඕනෑ මගුලක් කරගනින් කියා උගේ යාලුවෝ වූ අපි ද ඌට බණ දෙසීම නවත්වා පුළුවන් උදව්වක් කිරීමට සුදානම් වූයෙමු.
මගුලක් කියා කරගැසුවේ ලෝක මරාලයකට බව ඌට තේරුම් යද්දී ප්‍රමාද වැඩිය. ඊ ලඟට ඌ පිස්සු වැටුනා සේ එහාට මෙහාට පනිමින් මගුලට සුදානම් වුනාය. මගුල දවසට උගේ යාලුවෝ දෙන්නෙක් පින්තුරය සදහා උවමනා කරන බව ඌට මතක් වූයේ මගුලට සතියක් තියාය. ඊ ළඟට ඌ නාහෙන් අඩමින් සෙව්වේ උගේ පවට කරගැසිය හැකි ඩබලකි. මුගෙන් රොටියාට කෝල් එකක් ආවේ මහ රෑකය.
යාළුවා: අඩේ රොටියා තෝ ඇහැරලාද?
රොටියා තමාට හැකි ශිෂ්ටම ආකාරයට , තමා හිටියේ ජිම් එකට යන්නට සුදානමින් බවත් ඊට කල්වේලා වැඩි නිසා කල්මරන්නත් එක්ක බල්ලා සමග ඔට්ටු තිබු බවත් ඌට පැහැදිලි කළාහුය.
යාළුවා: ඒයි මේ තෝ ළඟ මගුලකට අදින්න පුළුවන් කළු කෝට් එකක් තියෙනවද?
රොටියා ආඩම්බරෙන් කිව්වේ ලඟකදී හමීඩියා එකෙන් ගත්තු කට්ට කළු සූටක් රොටියා ළඟ ඇති බවයි.
යාළුවා: ආ ආ තෝ දැන් යන්නේ හමීඩියා. පල පල තෝ කැම්පස් යද්දී ෂර්ට් ගත්තේ මහරගම පාර අයිනේ කඩෙන් නේද ඩො?
මේ මහ රෑ ඇහැරෙව්වේ රොටියා දැන් ෂර්ට් ගන්න තැන ගැන කොලොප්පන් කරන්නදැයි රොටියා සරල සිංහලෙන් උගෙන් ඇසුවාය
යාළුවා: අඩේ මේ මගේ මගුලේ බ්‍රයිඩ්මේඩ්ස් ල දෙන්නෙක් ඉන්නවා බන් ටින්කිරි කෑලි දෙකක්. කිරි කිරි ටෝයියෝ. කොල්ලොත් නෑ.
රොටියාට ටින්කිරි කෑලි ගැන මේ වෙලාවේ ඉන්ටෙරෙස්ට් එකක් නැති බවත් ඊට වඩා නිදා ගැනීමට රොටියා කැමති බවත්, උගේ උවමනාව රේන්ද අල්ලන්නේ නැතිව පැහැදිලි කරන ලෙසත් රොටියා ඌට දැනුම් දුන්නාය.
යාළුවා: අඩේ රොටියා තෝ ලෑස්ති වෙයන් මගේ බෙසා වෙන්න. අනිකට ඉන්නේ ලපය. ඌටත් කළු සූටක් තියෙනවලු.
රොටියාට බෙසා වීමට කැමැත්තක් නැති බැවින් ඊට වෙන අසරණයෙක් බාගත නොහැකි දැයි රොටියා යාලුවගෙන් ඇසුවාය.
යාළුවා: අඩේ පල් කතා කියන්න එපා බොල. වෙඩිම ලබන සතියේ. තොට කරන්න තියෙන්නේ කැමරාවට විරිත්තන්න විතරයි ඩො.
රොටියා සිය කැමැත්ත ප්රලකාශ කරන තුරු මූ පාන්දර වෙනකන් හරි කතා කරන බව තේරුණු නිසා උගෙන් ගැලවෙන්න රොටියා කැමැත්ත පල කළාය.
පහුවෙනිදා ටින්කිරි ගුලිය එහෙමපිටින්ම ගිල කුල්මත් වී සිටි ලපයා රොටියාට කතා කලේය. ඌ කෙල්ලෙක් නැතුව වේලෙයි. කෙල්ලන් ඇති අපට පැලෙන්න ඊරිසියා කරයි.
ලපයා: මාර චාන්ස් එක නේද බන් , උන් දෙන්න අහවල් බැංකුවේ කෑලි දෙකක් ලු. මරු බන්. එතනින් වත් ගොඩ යන්න බලන්න ඕනේ.
උන් දෙන්නා අහවල් බැංකුවේ උනාට රොටියාට අහවල් එකදැයි උගෙන් ඇසු රොටියා කෝල් එක කට් කළාය.

වෙඩිම දවසකට කලින් දා අපි සියල්ලෝම මනමාලයා වෙන්න ඉන්න එකාගේ ගෙදර ගියෙමු. අපේ බුවා රැවුල කපා කට් එක තියාගෙන සිටියේය. ඒ මදිවාට ඒ කට් එකම දැමීමට ලපයාව හා රොටියාව ද සැලූනයට දක්කාගෙන ගියේය. කට් එක දාගෙන වට පිට බලන විට අපේ බුවා පේන්න නැත. සැලූනයේ වට තිර ඇද තිබූ කොටසට හොම්බ දැමූ විට මෙන්න මේකා කොළ පාට තලපයක් මුණේ උලාගෙන පුටුවක හාන්සි වීගෙනය. දෑස වසා පුළුන් කෑලි දෙකකි. අපි ආ බව නොදැන ඌ සැලුනයේ කොල්ලාට දොඩවයි.
“ මල්ලි අර ඉස්සරහ දෙන්න වැඩේ ඉවර කරන්න කලින් මේක ඉවර කරන්න පුළුවන් නේද? උන් දෙන්නා දැක්කොත් වසල හමාරයි”.
සද්ද නොකරන ලෙස හස්ත මුද්‍රාවෙන් සැලුනයේ කොල්ලාට තග දැමූ අප, කොලපාට උගේ මුණේ පින්තූර කීපයක් ජන්ගමයාට එන්ටර් කරගත්තෝය. ඒවා ඒ මොහොතේම උගේ ගෙදර රැස්වී සිටින අපේ සෙට් එකට පියඹා ගියෝය. අනතුරුව අපි ඩබල සැලුනයේ ඉදිරිපසට මාරු වී ගියාය.
ටික වෙලාවකින් උගේ පෝන් කටුව නාද වෙන හඩත්, උගේ පැනියත් අපට ඇසුණේය.
“ආ සුදු, ඔව් පැටියෝ ඒක තමා මේ කරන්නේ. ඔව් ඔව් ඔයා කියපු එක තමා. ආයුර්වේදික් එක”
එහෙනම් මූ මේ කන්නේ මණ්ඩලෙන් අනුමත වූ රැගකි. පිරිමියෙක් වෙලා ඉපදුණු වරදට ඌ දැන් සිටම ගැනිගේ පදේට නටයි. නොනටා හිටියොත් වෙන දේ දන්නේ පිරිමින් වූ අපමය.
අපේ බුවා ගැන අනුකම්පාවෙන් අපි දෙදෙනා නැවතත් සැලුනයේ පුටු ගත වී හෙඩ් මසාජ් දෙකකට එන්ටර් වීමු. මැදදී බබළන මුහුණින් යුතුව කාමරයට පැමිණියේ ඌය. ගියේ කොහේදැයි අප ඇසු කල, බිල ගෙවීමට ගියැයි ඌ කී බොරුව, නිවසට ගිය විට ඌටම කැරකි ආවේය. නිවස පුරා තැන තැන ගසා තිබුනේ උගේ කොළ මුණේ පින්තූර කඩදාසිය. පහුවෙනිදා මනමාලයා වෙන්න ඉන්න එකා නිසා අපි ඌව ඊට වඩා මැඩේව්වේ නැත.
පහුවෙනිදා පාන්දරම හැද පැළඳ ගත් රොටියා , ලපයා හා මනමාලයා වෙඩිම ගන්නා හෝටලය බලා ගියෙමු. ටින්කිරි කෑලි දෙක ඔසරි දෙකක් පටලවාගෙන ලොබියේ සිටියෝය. ඈතට පට්ට ලස්සනට පෙනුණු නිසා රොටියාටද නැති ඉන්ටෙරෙස්ට් එකක් ඇති විය. ලඟට ගොස් බලන විට මැටියෙන් අඹා තාම වේලී නැති බලි දෙකක් වගේය. හිනාවෙන විට කම්මුල් දෙපසට වී මේකප් තට්ටුව පලාගෙන මුණ පුරා බයානක ඉරි තලා යයි. උන්ගේ චිකි චිකිය නවතින පාටක් නැත. ලපයා බලාපොරොත්තු ඇතුව උන් ලඟට ඇස් දල්වාගෙන සිටියි
ඊළඟට මනමාලිය ආවාය. කොණ්ඩය පිටුපස තිබූ අති දැවැන්ත මල් මාලාව හැරුණු විට ඇගේ වෙන වැරද්දක් රොටියාට පෙනුනේ නැත.මනමාලිය පිටුපසින් අප වෙත කෝල බැලුම් හෙලමින්, පද්දමින්, ගස්සමින් ආවේ අහවල් ජාතියේ එකෙකි. මනමාලිය ඌ සමග දොඩවයි. ටින්කිරි කෑලි දෙකද ඒ අසලය. “ මේ දෙන්නවම තමා මගේ හිතේ තිබ්බේ. මගේ ස්කින් කලර් එකටයි හයිට් එකටයි ගැලපෙන්නේ මේ දෙන්නනේ. අවුරුද්දකට කලින් ඉඳල මේ ගොල්ලන්නට කියල තිබ්බේ” ටින්කිරි කෑලිද කතාවට හුමිටි තබයි.
අපේ බුවා අපිට දැනුම් දුන්නේ සතියකට පෙරය. උගේ එකම රික්වයර්මන්ට් එක වූයේ කළු සූටකි. රොටියාට සුළු කරකැවිල්ලක් ද හටගත්තාය.
වැඩ කටයුතු සිද්ද වී යන ආකාරයට දැන් වී ඇත්තේ ටින්කිරි කෑලි දෙක පැත්තකින් තබා අර ඩයල් එකෙන් පන බේරා ගැනීම බව රොටියාට හා ලපයාට ඉක්මනින්ම තේරුම් ගියාය. ලපයාට කෙල්ලෙකුත් නැති එකේ අර බුවා ගැන හිතුවොත් නරකදැයි රොටියා ඇසු ප්‍රශ්නයට ඌ පිළිතුරු දුන්නේ දරුණු කුනුහරුපයකිනි.
ඊළඟට උදා වූයේ පින්තූර ගැනීමේ බාරදූර කටයුත්තය. පින්තුර ගන්නා එකා තොදොල් වේවි ඉන්න ඕනෑ පෝසස් ගැන කියයි. අපේ බුවා ගස් උඩ නගියි. පොටෝ බුවා ඇක්සන් කියූ විට ගහෙන් පනියි. මනාලිය ඌ පනිනා දෙසට හතර ගාතයම දික් කරයි. අපි ඒ කිසිවක් නොදකින තාලෙට පිටුපසින් ගස් වැල් වලට අත් දික්කරමු. බුවා පොටෝ එක ගනී. ඊළඟට මනා පැනපු විදිය වැරදියි කියයි. රොටියාට තව ටිකක් අත උස්සන්න කියයි. පොටෝ බුවා මේ මල සමයම ඌ ගේ හිතට ඇතිවන තුරු නැවත නැවත අප ලවා කරවයි. මෙහෙම ගියොත් හනිමුන් කෙසේවෙතත් අපේ බුවාට තෙල් බෙහෙත් සාලාවට නම් ටක්කෙටම ගිය හැකි බව රොටියාට සිතුණාය.
වෙන්න තියෙන බයානකම දේ සිද්ද වූයේ අපව පැත්තකට කර කපල් පොටෝ ගන්නට යෑමේදීය. යන යන තැන මනාලියගේ මේකප් ආම්පන්න ඔසවාගෙන ආ අහවල් බුවා , අපව නිදහස් කල හැටියේ අප වෙත දුව ආවාය. ඊ ලගට ඌ චුයින්ගම් එකක් වී අප යන යන තැන පස්සෙන් එන්න පටන් ගත්තාය. උගෙන් වහන් වී හෝටලයට රිංගා ගැනීම ලත් තැනම ලොප් උනේ අපේ පොටෝ සූට තව ඉවර නැතැයි පොටෝ බුවා කල දැන්වීමටය.
මනා උඩපනින බිමවැටෙන විට අරූ ‘පවූඌ මෙයා’ කියමින් අපිට ජැක් එක ගසයි. ලෙල දෙන නිතඹ අපේ ඇගේ වද්දවයි. නෙතගින් බැලුම් හෙලයි. ටෙලිපොන් නම්බරේ ඉල්ලයි.
කාපු දරුණු කට්ටට හරියන්නත් එක්ක දවල්ට පැලෙන්න කන්න රොටියා ලොකු බලාපොරොත්තුවකින් සිටියාය. ඒකටත් හෙනහුරෙක් පාත්වී හෝටල් සාලාව හරි මැද වේදීකාවක් අටවා තිබුනාය. ඒ මනාල ඩබල සහ පිරිවරටය.
රොටියාට හා ලපයාට සිද්ද වූයේ යාලුවෝ කියන මීහරක් රැල අපිට පේන්න පිගන් ගණන් ගිලිද්දී, ඩයිනින් මැනර්ස් එක්ක ලෙවකන්නය.
කාලය ගෙවී යද්දී ටින්කිරි කෑලි දෙකද උණුවී වැක්කෙරෙන ඉටි රූප දෙකක් වී තිබූ නිසා රොටියාට උන් ගැන තිබූ සුළු හෝ ඉන්ටරෙස්ට් එකද දිය වී ගියාය.
යාළුවන් සමග කෑ බෙරිහන් දෙන්න ලැබුනේද සුළු ඉඩකි. අරකට මේකට ආදී වශයෙන් මගුල ඉවරවන තුරු රොටියාට හා ලපයාට කැඳවුම් ලැබුනාය.
අවසානයේ රොටියා හුස්මක් ගත්තේ වෙඩිම ඉවර වී ගෙදර ගිය පසුවය. මීට පසු රොටියාගේම අයියාට වුවත් බෙස්ට්මන් නොවීමට රොටියා විසින් පට්ට දරුණු තීරණයක් ගත්තේ එදා රෑය


Saturday, November 16, 2013

රොටියාගේ ප්‍රථම ප්‍රේමය

                                                  

රොටියා හය හතර තේරුණ දා සිටම මනමාලයාය.මොන්ටිසෝරියේදීද ලාවට එහෙන් මෙහෙන් තිබූ කොකු ගැන රොටියාට හීනෙන් මෙන් මතකය.කෑම පෙට්ටියේ තිබූ පාන් පොඩි එකියක සමග බෙදාගත් ආකාරයත්,ඒ එකියවම ඔන්චිල්ලාවේ හිඳුවා තල්ලු කල ආකාරයත්,වාර්ෂික විවිද ප්රසංගයේ ඒ එකියම බදාගෙන කපල් ඩාන්ස් දැමු ආකාරයත් මතක ඇති මුත් රොටියාට සවිස්තරාත්මකව මතක පළමුවෙනි ආදරය පටන් ගන්නේ එකේ පන්තියෙදිය.
රොටියා ෂර්වුඩයේ රොබින් හුඩ් වන විට ඈ මැරියන් වන්නිය.දුනු ඊතල මානාගෙන තම පෙම්වතියව රැක ගැනීමට දුෂ්ටයින් පසුපස හඹා ගිය ආකාරය රොටියාට අද මෙන් මතක ඇත.එකල බොහෝ විට ගිස්බන්ඩ් වන්නේ මෙකල බොහෝ මැරීයන්ලා පිරිවරාගෙන පියාඹන හාදයෙක් වන අතර,ඌට එදා මැරියන් නැති උනු එකේ ඇරියස්ද අද ලැබී ඇත.
එකල රොටියාගේ ළමා කාලයේ මෙකල මෙන් පොඩි එව්වන් ඉල්ලන ඉල්ලන එක අරන් දෙන ජාතියේ අම්මලා තාත්තලා හිටියේ බොහෝ අඩුවෙන්ය.එකල පොඩි එවුන් අම්මලාට බය වී සිටියා මිස මෙකල මෙන් අම්මලා පොඩි එවුන්ට බය වී සිටියේ නැත.එවැනි පසුබිමක ඉඳහිට අලුතෙන් ලැබෙන පැන්සල මකනය උවද මහමෙරක් උවත්, රොටියා පොඩිකමට දානාදනන්ජය වී ඒවා ද තම ආදරවන්තිය සමග බෙදා ගත්තාය.
ඇගේ මේසය නිතරම තිබුනේ රොටියාගේ ඇස ගැටෙන ලෙස බව මතක ඇති මුත්,එපමණ ආදරය කල ආදරවතිය ලඟම මේසයේ රොටියා වාඩි නොවුයේ මන්දැයි රොටියා අදටත් කල්පනා කරනවාය.ඈ දෙස බලාගෙන මැවූ සිහින මන්දිර ඉඳහිට ගුරුවරියගේ හඩින් බිඳී ගියද පසුබට නොවෙන රොටියා ඊළඟ මිනිත්තුවේ ඊට වඩා විසාල සිහින මන්දිරයක් ඇය සමග ගොඩ නගනවාය.
පන්තියේ හිටි අසමජ්ජාති කොලු කුරුට්ටෝ ටික ටික ඈවත් සෙල්ලමට එක්කරගන්නා විට,ඈ සමග මදටිය අහුලන්න යන විට,ඉන්ටර්වල් එකේ කුල් පැකට් බෙදාහදාගෙන උරන විට රොටියා කල්පහු නොකරම තමාගේ අදහස ඇයට ප්ර කාශ කරන්නට හිත හදා ගත්තාය.
ඒ අනුව පහුවෙනිදාම ඉන්ටවල් එකේ ඈව පිට්ටනියේ ගසක් යටට කැඳවාගෙන ගිය රොටියා ඉතාමත් බරපතල ආකාරයට මෙසේ පැවසිය.
“මම ලොකු උනාම,වලාකුළු උඩින් ලොකූඌ මාලිගාවක් හදල,වලාකුළු උඩින් පියාඹලා ඇවිල්ලා ඔයාවත් අරගෙන පියාඹල යනවා.ඔයාට එතකොට ලස්සන කුමාරිකාවක් වෙලා හැමදාම මාත් එක්ක ඉන්න පුළුවන්නේ”
කතාව මුළුල්ලේම ඈ කටේ ඇඟිල්ල ගහගෙන රොටියා දිහා ඇස් ලොකු කරගෙන බලා සිටියාය.රොටියාට හිතුනේ ඈ රොටියා ගැන ප්‍රේමයෙන් මුසපත් වී ඇති බවයි.ඉන් පසු දවස් දෙක තුන තුල ප්රීතියෙන් ඔකඳ වී සිටි රොටියා,තමාට දැන් විවාහයක් කර ගැනීමට ගෑණු ළමයෙක් සිටින බවත්, එය තමන්ගේ හිතට ලොකු නිදහසක් බවත් රොටියාගේ අම්මාටද දැනුම් දුන්නාය.
ඊලඟ මාස දෙක තුනක කාලය තුල,බඳින ගෑණු ළමයාගේ විස්තරද,කසාදයේ තොරතුරුද රොටියා සමඟ බරපතල විදියට සාකච්චා කිරීම ඇරෙන්න වෙන වැඩක් රොටියාගේ තාත්තාට තිබුනේ නැත.
කෙසේවෙතත් වසර අවසානයේ රොටියාගේ ගෑණු ළමයා පැදුරටත් නොකියා පවුල පිටින් විදේශගත වූ නිසා රොටියාගේ ප්ර ථම ප්රේරමයද, කසාදයද අතරමග ඇනහිටියාය

Friday, November 15, 2013

රොටියාගේ ගෑණු ළමයාගේ කියුටෙක්ස්

පහුගිය දිනක රොටියාට මදි නොකියන්න බේත ලැබුණාය. ඒ කෙසේද යත්, රොටියා සහ ගෑණු ළමයා ගමනක් යන්න සෙට් වී, ගෑණු ළමයාගේ ගෙදරින් ගෑණු ළමයාව වාහනයට ගොඩ කර ගෙන ඇගේ මුණ බැලූ රොටියාට රෝස පැහැ මුහුණක් සහ රතු පැහැ දෙතොලක් පෙනුනි.
‘ආ කියුටෙක්සුත් ගාලා’ රොටියාට ඉබේම කියවුනාය. එසැනින් රතු පැහැ දෙතොල රොටියාගේ බල්ලාගේ පස්ස පැත්ත වගේ රැලි ගැසී, රෝස මුණ රතු වූ වනාහි, වැඩේ සුබ මොහොතින් අල වූ බව රොටියාට වැටහුණාය. රොටියා යනු ලිප්ස්ටික් කියුටෙක්ස් වෙන් වෙන්ව අඳුනාගත නොහැකි පල් බුරුවෙකු බවද, කැම්පස් ගියාට රොටියා විබාගේ පාස් වී ඇත්තේ උත්තර පත්තරේ බලපු එකාට වැරදිලා නිසා බවද යනාදී වශයෙන් රොටියාගේ උපතේ සිට සවිස්තර වාර්තාවක් ගෑණු ළමයාගෙන් රොටියාට ලැබුණි. එම කතාවෙන් රොටියා උගත් වැදගත්ම පාඩම නම් ලිප්ස්ටික් ගාන්නේ තොලට සහ කියුටෙක්ස් ගාන්නේ නියපොතු වලට බවය.
ගෑණු සරීරය සරසන්න දාහකුත් තව එකුන් සියයක් තරම් වූ අලේපයන් ඇත්තේය. ඒවායේ නම් වෙන් වෙන් වසයෙන් දැන කියා ගන්නට නම් පිරිමින් වූ අප මාස හයක වත් පුර්ණ කාලීන පාටමාලාවක් කල යුතු බව රොටියාගේ නම් අදහසය. දවසක් ගෑණු ළමයා නොහිටිය වෙලාවක ඇගේ ගෙදර ගිය රොටියාට නැන්දම්මාගේ ඇස වසා ඇගේ කාමරයට රින්ගිමේ අහඹු පොටක් පෑදුනේය. ඇගේ මේසය මත තිබූ බොඩි වොෂ්, ෆේස් වොෂ්, ෆේස් ක්රීම්, බොඩි ක්රීම්, ෆුට් ක්රීම්, හෑන්ඩ් ක්රීම්, සන් ක්රීම්, නයිට් ක්රීම්, ඩේ ක්රීම් ආදී වූ අට අනූවක් කළමනා දුටු රොටියාට, රොටියාගේ අනාගතය පිළිබද සාදාරණ බියක් හටගත්තාය. (ඉහත ලැයිස්තුව රොටියාට හදිසියට ජන්ගමයාට එන්ටර් කර ගත හැකි වූ ලැයිස්තුව පමණි. පැයක් හමාරක් කාමරය සෝදිසි කල නම් පුල්ස්කැප් කොළ පනහක් හැටක් වූ තරම් ලැයිස්තුවක් ලියන්නට තිබුණාය)
පුදුමය කියන්නේ ඔය කියන තරන් කළමනා උලා හිටියද, උදේට ලයිෆ්බෝයි ගා මුණ හෝදන රොටියාගේ මුණේ හා ඇගේ මුණේ එතරම් වෙනසක් නැති වීමය. සමහර දවසට ඈ නියපොතු වලට පාට ගාගෙන, ඒ මැද්දෙන් බලි ඇරියා වැනි මල් අලවාගෙන ලස්සනදැයි රොටියාගෙන් අසයි. ඒ මොන උලව්වක්දැයි රොටියා අසන කල නේල් ආර්ට් කලෙමි යයි පවසයි.
රොටියාගේ ගෑණු ළමයා පමණක් නොව සමහර දාකට පාරේ යන විට රොටියා දකින ගෑණු ළමුන් ද ලේඩි බර්ඩ් කුරුමිණියන් වැනිය. ඇසි පිය කොළ පාටය, කම්මුල් රතු පාටය. දෙතොල් දම් පාටය. ඒ ලස්සන වීමැයි උන් සිතා සිටිනවානම් හොම්රන් පැස්ටල් පාට පෙට්ටියකටද ලස්සන ගෑණු ළමයෙක් යයි කිව හැක්කේය.රොටියා හිතන ආකාරයට ප්රශ්නය ඇත්තේ ගෑණු ළමුන් මල් වැනිය කියා මුලින්ම දෙසා බෑ එකා අතය. ඌ කට කහනවාට කී කතාව එහෙම්පිටින්ම ගිල ගත් ගෑණු උදවිය දැන් මල් වගේ වෙන්නට ඒ වගේ පාට මුණේ උලනවා වන්නට ඕනෑය.

                                      


රොටියා, මගියෝ හා ට්රැපික් පොලිස්

දැන් ලංකාවේ එව්වන්ගෙන් වැඩිහරියක් තම තමන්ගේ අනේකවිද සියලු වැඩකටයුතු කරන්නේ තමුන්ගේ වාහනයේ යද්දීය. පෙළක් එවුන් කති, සමහරු මල් කඩති, ගෑනි සමග රණ්ඩු වෙති, හිස පිරති, ජෙල් කරති. කෙටියෙන් කිවහොත් හරියට රිය පැදවීම හැර අනෙක් සියලුම වැඩ කටයුතු කරති.
මේ ජාතියේ උන් කරන්නේ ඉස්ඉස්සරවෙලාම තමුන්ගේ වාහනය දකුණු පැත්තේ මං තීරුවට ඔබා ගැනීමය. අනතුරුව සුබ මොහොතින් තම තමුන්ගේ වැඩ පටන් ගන්නාහුය. පිටු පස වාහනයේ එකා පිස්සු වැටුනා සේ නලාව නදකරද්දී උන් උන්ගේ ලෝක වලය. පිටුපස බුවා තරමක වැඩකාරයෙක් නම් බස් ටිපර් රථ අස්සෙන් වම් මං තීරුවට දමා අරකාව පසු කරනවා ඇත.නැත්තන් ඌට සිදු වන්නේ කැමැත්තෙන් හෝ අකමැත්තෙන් අරකා පසුපස කෙටිමටය.
හයි වේ වල තත්වය නම් අන්තිම දරුණුය.සමහර එවුන් මේවායේ වම් මං තීරුවක් ගැන අසාවත් නැති ආකාරයට මනෝ විකාරයෙන් දකුණේ කොටති. වාහනය තුල සිටින සිය පවුලේ එව්වන්ට මාර්ගයේ සිරි පෙන්වති.
ට්රැපික් පොලිස් මහත්තුරු නැති, ලයිට් පමණක් නැති මංසන්දි වල සියලු දෙනාටම බඩු හම්බකරන ආකාරයේ වැඩ සිද්ද කරන බුවාලා හා බුවීලාද ඇත.නැති කලබලයක් මවා පාමින්, යන්නට බැරි බව පෙනී පෙනීම, උන් සිය වාහනය සියලුම මංතීරු අවහිර වන සේ පාර හරහට ස්ථානගත කරති.ඊට පස්සේ පාරේ යන ඔක්කොටම තපින්න සිද්දවෙනවාය.අනික් මංතීරු වල කොළ පිට කොළ වැටුනද, පාරේ හරි මැද විරවාගෙන සිටින එකා හෝ ඒකීයට යන්න හම්බවෙන තුරුම අනික් එවුන්ද විරවාගෙන සිටිය යුතුය.
සමහර එවුන් යන්න හදන්නේ රෝද වලින් නොව නලාවෙනි. උන් සිය නලාවල් තාලෙට හඩවමින් පාරේ පෙම් කෙළිති. ට්රැපික් ලයිට් වල නවතාගෙන සිටිද්දීද සිය නලා හඩවති. රොටියාගේ තාත්තාට නම් මෙවැනි එවුන් පෙන්නන්න බැරිය. රොටියාගේ තාත්තාට කන්ටේනර්, ලොරි ටිපර් සමග උවත් උරෙන් උර ගැටිය හැකි, එක්දාස් නමසිය හැත්තෑ ගණන් වල ජපානයේ නිෂ්පාදිත පට්ට පිකප් රියක් ඇත. හෝන් බුවෙක් බැරි වෙලාවක් වත් රොටියාගේ තාත්තාගේ පිකප් රථය ට්රැපික් ලයිට් වල නවතා ගෙන සිටියදී, පිටුපසින් නලාව නාද කලොත් ඌට බඩු හම්බවෙනු ලැබේ. රොටියාගේ තාත්තා කිසි කතාවක් නැතුව වාහනය රිවස් ගියරයට දමයි. මෙය දකින 2012 හෝ 2013 නිෂ්පාදිත ජපන් රෝද හතරක නැගී ඉන්නා හෝන් බුවාට හීන් දාඩිය දමයි. පිස්සු වැටුනා ඌ සේ ඊලගට හෝන් ගහන්නේ වාහනය නවත්වා ගන්නා ලෙසට රොටියාගේ තාත්තාට දන්වන්නටය.
ට්රැපික් අඩු කරන පොලිස් රාළහාමිලා ඉන්නවා සේම, ප්රිදාන මංසන්දි වල කිසිම අවහිරයකින් තොරව වාහන යන ආකාරය පෙන්නන්න බැරි ට්රැපික් පොලිස් රාළහාමිලාද ඇත. මේවැනි මංසන්දි වලට පැනගෙන එන ඔවුන්, ට්රැපික් ලයිට් නිවා දමා වාහන හැසිරවීම උන් බාර ගනිති. ට්රැපික් පෝලිම හැතම්මක් විතර දික් ගැහෙන විට උන් ප්රීතියෙන් පිනා යති. පෝලිම හැතැම්ම හතරක් පමණ දික් ඌ විට උන් ප්රීතියේ පරම කෝටියට පත්වෙති. මේ වගේ ට්රැ‍පික් පෝලිමට හසුවූ වහාම රොටියා ඊළඟ දුම්රියේ යාමට හිත හදා ගෙන අදාළ රාළහාමිටත්, රාළහාමිව පොලිසියට ගත්තු රාළහාමිටත්, ඒ රාළහාමිගේ රාළහාමිටත් ආදී වසයෙන් මයිත්රි කරන්න පටන් ගන්නවාය.
කෙල්ලන්ගේ වාහන එළවීම ගැන ලියන්නට ගියොත් මේ ලිපිය අර ට්‍රැපික් පෝලිමට වඩා දික් වෙනවාය.. මොකදැයි කිව්වොත් රොටියාගේ ගෑනු ළමයා ලයිසොන් කියන කෙහෙල්මල ගත්ත දා පටන් ගෙදර යස අපුරුවට තිබූ වාහනයට ටිකට් එක ඇදී තියෙන නිසාය. ඒ හැම තැල්මක්, සිරුමක් පිටුපසම ගොනෙකුගේ හෝ බුරුවෙකුගේ නමක් මිසක් රොටියාගේ ගෑනු ළමයාගේ වැරද්දක් ඇත්තේම නැත.
ගෑනු නම් මාරය. කතාවෙන් නම් උන් තරන් රිය පැදවීම ප්රරගුණ කල ජාතියක් නැතුවා වගේය. එත් මේ පිරිමි අපි වාහන නොපදින දාට, ගෑනුන්ගේ වාහනවල ගැටෙන්න පිරිමි අපේ වාහන නැති වූ දාට, උන් උන්ගේ වාහන උන් උන්ම හප්පා ගත් දාට ඒ වරුණේ බලන්නට පුළුවන.

රොටියාට රොටියාගේ නොවන රොටියගේම ආදරයක් තිබුනා....

රොටියා ජයන්ත චන්දසිරි මහත්තයාගේ රසිකයෙකි. සමනල සන්ධවනිය චිත්තරපටය බලන්න රොටියා පෙරුම් පිරුවේ මුහුරත් උළෙල දුටු දා සිටය.චිත්තරපටය ගැන නම් කතා දෙකක් නැත. එය බැලූ දා රොටියාගේ ඇතුලාන්තයම හෙල්ලී ගියේය. මේ කියන්න යන්නේ ඒක ගැන නොවේය. චිත්තරපටය බැලූ රොටියා ගෙදර ඇවිත් මුලින්ම කලේ එහි තේමා ගීතය(මට මගේ නොවන මගේම ආදරයක් තිබුනා)මුණු පොතට ශේයාර් කිරීමය.හැරෙන තැපෑලෙන් පිළිතුරු ලැබුනේ ජන්ගමයා හරහාය.රොටියාගේ ගෑනු ළමයාට අම්බානෙක තදවී තිබුණාය.

ගෑනු ළමයා:“හුහ් තාම හිතන්නේ අර මල හොන්තුව ගැන නේද?මල කෝලන්.රට්ටු හිනස්සන පොස්ට් දානවා”


සබ්ජෙටය රොටියාට මීටර් වෙන්න සුවල්ප වෙලාවක් ගියේය.සාමානයෙන් රොටියාගේ ගෑනු ළමයා මුලින් වක්කඩ කැඩුවා සේ බෙරිහන්දී ඊලඟට බෙරිහන් දුන් හේතුව කියනවාය.පරිස්සමෙන් ප්රශ්න කල රොටියාට ගෑනු ළමයාගේ බෙරිහන්දීමට හේතුබූත වූ සිද්දිය අනාවරණය විය.රොටියා අදාළ සින්දුව ශේයාර් කලේ හුදී ජන පහන් සංවේගය උදෙසා බැව් කොපමණ තේරුම් කරන්න හැදුවත් ඇය තේරුම් ගත්තේ නැත.අවසානයේ ඇයට කැමති දෙයක් හිතාගන්න ඉඩ දුන් රොටියා නින්දට ගියේය.
දවස් ගත වෙත්ම රොටියාට ගෑනු ළමයාට නප්පියට තද වූ හේතුව සාදාරන බව හිතීමට හේතු කරණා සිද්ද උනාය. හැම එකාම පිස්සු හැදුනා සේම උන්ගේ නොවන උන්ගේම ආදර ගැන දොඩවන්න පටන්ගෙන තිබුණාය. හොටු කොල්ලෝ කෙල්ලෝ පවා බරසාර වචන වලින් ලිය තිබූ චිත්තරපටි විචාර කියවූ රොටියාට දරුණු හිසරදයක්ද හැදුනේය.
සතියක් දෙකක් ගත වෙද්දී උගේ නොවන උගේම ආදරයක් නොතිබුණු එකෙක් හොයාගැනීමට වඩා පහසුවෙන් කිසිවෙකු නොමල ගෙයකින් අබ ඇට මිටක් ගේන්නට තිබුණාය. රොටියාටද මෝල් විය. එතකොට හැම එකාම පාහේ ජීවිත කාලය පුරාම අනුන්ගේ ගෑනු මිනිස්සු ගැන හිත හිතා ඉඳ ඇත්තේය. බොහෝ එවුන් කසාද බැඳ ඇතත් ආදරේ කොට ඇත්තේ බැඳපු එකාට නොවේ.
උදේ හතරහමාරට නැගිට ,උදේ කෑම එක, දවල් කෑම එක හදා දී, කමිසය කලිසම අයන් කොට දී, සපත්තු මේස් සොයා දෙන ගෙදර ගෑනිට නොව බොහෝ එවුන් ආදරේ කොට ඇත්තේ අවුරුදු දහයකට පෙර බූට් එක තියා වෙන කොල්ලෙක් එක්ක පැන ගිය කෙල්ලටය.නැත්තන් හරියට වචනයක් නොදී අවුරුදු ගානක් පස්සෙන් යන තැනට වැඩ සලස්වා අවසානයේ වෙන කොල්ලෙක් බැන්ද කැම්පස් කෑල්ලටය.එහෙමත් නැත්තන් IRC අයියා කෙනෙක් හිටපු නිසා මවුපියන් අකමැති වූ ගමේ කෙල්ලටය, බස් එකේ පිටිපස්සේ කොනේ සිට් එකේ රතු මල් ගවුමක් ඇඳන් ගිය නංගීටය.සමහර පැඟිරි කෙල්ලන් ආදරේ කොට ඇත්තේ උඩ පන්තියක සිටි සුදු උස අයියාටය.
මේ ටිකකි.මෙවන් ආදර ඉහේ කෙස් ගානට දැන් හොයා ගත හැකිය. රොටියා ටද ටික කාලෙකට පෙර ගෑනු ළමයෙක් ගැන හිතක් පහල උනේ ඇගේ රුපය නිසාය. රොටියා කටුනායක කොළඹ හයිවේ එක හැදීමට ගිය කාලය තරම් කාලයක් ඈ ගැන හිත හිතා ඉන්නා අතරේ ඇය ලෝකේ නැති කතා කියමින් තෙපර බබා හිටියාය.අවසානයේ නුවණ පහල වූ රොටියා ඈ තරම් රූපය නැති මුත් රොටියා කැමති ගෑණු ළමයෙකුට කැමැත්ත ප්රගකාශ කළ පසු ඈ ද හැරෙන තැපෑලෙන්ම කැමැත්ත පල කලාය.ඒ රොටියාගේ ප්රේෙම කතාවය. මහප්පරාන නැති මේ ගෑනු ළමයාට රොටියා ඇත්තටම කැමතිය.සරලය සුන්දරය. පෙර ඒකීය මෙන් ඈ රොටියාව මැඩේව්වේ නැත.අම්මලාගේ කැමැත්ත මගේ කැමැත්ත කීවේද නැත. ඈ මාව කලක පටන් හදුනනවාය. ඈ මගෙන් කල් ඉල්ලුවේද නැත.ඇයට අම්බානෙකට කේන්ති එයි. නමුත් රොටියා දැන් එයට හුරුවී ඇත.
එහෙව් රොටියා ට රොටියගේම නොවන රොටියගේම කෙහෙල්මල් ආදරයක් නැත. නමුත් ලංකාවේ බොහෝ එවුන්ට නම් එය එසේ බව රොටියාට හැගේ.
පණ්ඩිතයෝ අමනාප නොවෙත්වා. රොටියා මේ ලිව්වේ සමනළ සංධවනිය යන අති සන්වේදී චිත්තරපටිය ගැන නොව ලංකාවේ බොහෝ එව්වන්ගේ මානසික තත්වය ගැනය.