Wednesday, February 18, 2015

බස් හා හුඹස්

පහුගිය දිනෙක ඇස ගැටුණු පුවතක දැක්වූයේ හැටන් - මහනුවර බසයක දොර අසල සිටගෙන ගමන් කල ගැබිණි කාන්තාවක්, රථය වංගුවක් ගන්නවාත් සමගම බසයෙන් එලියට විසිවී ගොස් ඇති බවයි. ඇය තවම දැඩි සත්කාර ඒකකයේය. ඇයට ඉක්මන් සුවත් සිගිත්තාට නිරෝගී සුවත් මුලින්ම පතන්නෙමි

බොරැල්ලේ පිහිටි ආයතනයක සේවය කරන, හලාවත පදිංචිව සිටින, දිනපතා නිවසේ සිට පැමිණෙන , ගමනා ගමනය සඳහා පොදු ප්‍රවාහන සේවය යොදා ගන්නා අයෙකුට, නිවසට යාමේදී ගමන් කල හැකි ආකාරයන් කිහිපයක් ඇත

1. මරදානට ගොස් දුම්රියෙන් - අසුනක් නැත
2. කොටුවට ගොස් දුම්රියෙන් - සමහර විට අසුනක් ඇත
3. පෑලියගොඩට ගොස් බසයෙන් - අසුනක් නැත
4. කොටුවට ගොස් සුපෝඛබෝගී බසයේ - අසුනක් ඇත
5. කොටුවට ගොස් සාමන්‍ය සේවා බසයෙන් - අසුනක් ඇත

ඔක්කොම පැත්තකින් තබා මින් 5 වැනි විදිය තෝරා ගන්නේ ආතල් එකට නොවේ. කොටුවට ගොස් සාමාන්‍ය ගමන් සේවා බසයකට නගින මගියෙකු බොහෝ විට අරමුණු කරන්නේ මුදල් අඩුවෙන් ගෙවා , ගමනාන්තය කෙසේ වෙතත් ගමනෙන් හතරෙන් තුනක් වත් ඉඳගෙන යාමයි. අසුන් සියල්ලම පිරි ඇති දුර ගමන් බසයකට , පංචිකාවත්ත හරියෙන් ගැබිණි මාතාවක් හෙම නැග්ගොත් අර අසුනේ ඉන්නා එකාට දෙයියන්ගේම පිහිටය. හාමුදුරු නමක් නැග්ගත් ඒ සන්තෑසියමය

දුර ගමනක් යන විශේෂ අවශ්‍යතා ඇත්තෝ - ඒ කියන්නේ ගැබිණි මව්වරු , පුජක තුමන්ලා පොඩ්ඩක් කල්පනා කොට , අදාළ බසය ගමන ආරම්බ කරන තැනටම ගොස් නැග්ගොත් කවුරුවත් අපහසුතාවයට පත්වෙන්නේ නැත්තේය. හැම අවස්ථාවකම මෙය ප්‍රායෝගික නැත. නමුත් හැකි සෑම විටකදීම වත්...

ගැබිණි මව්වරු හෝ කුඩා ළමුන් වඩාගෙන ඉන්නා මව්වරුන් නම් බොහෝමයක් හිතාගෙන ඉන්නේ තමුන්ට අසුනක් ලබා දීම විය යුත්තක්ම ලෙසටය. සැබෑවකි. එය විය යුත්තක්මය. නමුත් අසුන් දුන් එකාට පොඩි හෝ ඉස්තුතියක් ඇත්නම් , බසින විට නැවත දුන් තැනැත්තාටම අසුන ලබා දී යනවා නම් කොච්චර සුන්දරද..

මුල් පුවත ගැන සැලකුවොත් අදාළ මව සිට ඇත්තේ පාපුවරුවේය. පාපුවරුවේ ඉන්නා කාන්තාවක් ගැබිනියක්ද නැත්දැයි වාඩි වී සිටිනා මගීන්ට පෙනෙන්නේ නැත. වරද ඇත්තේ කොන්දොස්තර අතය.

ඒත් කොන්දොස්තරද බලෙන් මගින් නංවා ගන්නේ නැත. තමාගේ තත්වය දන්නේ තමන්මය. සුදුසුම දෙය නම් කෙටි ගමන් බසයකින් අදාළ තැනටම යෑම හෝ කෙටි ගමන් බසයන් කිහිපයක් මගින් අදාළ තැනට යාමයි. ගතවෙන කාලය වැඩිය. ඒත් කරන්නට දෙයක් නැත.

කිටිටියේ තෙරපෙන බසයක සෙනග නුදුටුවා සේ නගින්නේ නැතිව, ඒ මවට තව ටිකක් කල්පනා කරන්නට තිබිණි

කිසිසේත්ම මෙතනට අදාළ නැත. නොකිව්වොත් කට කහන නිසා මෙසේද ලියමි

*ජිවිත කාලය පුරාම අරක්කු වලින් යැපුණු බේබද්දෙකු අසනීප වූ විට වෙනකෙකුද අගතියට දැමීමට සුදානම් වෙමින් පරිත්යාගියෙකුගේ ශරීරාංග යදින විට, එය නො දුන්නේයැයි යයි කියමින් කාටවත් දොස් නැගීම සාදාරන නැත. පින්වත් අයෙකු එය ලබා දුන්නොත් ඔහුව අගය කල යුත්තේය.

**බැරි වන විට, "අපි පුළුවන් කාලේ සල්ලි ගොඩ ගහගත්තේ නෑ. හම්බ කළේ මිනිස්සු.. ඒකයි අපට තාම ගෙයක්වත් නැත්තේ.." යයි පැවසීම උදම් ඇනීමක් හෙම නොවේ. එවැනි අයට උදව් කිරීමට අනෙක් මිනිස්සු බැඳී නැත්තේය. "ඉස්සර මං උදව් කරපු අය දැන් මං දිහා බලන්නේවත් නෑ.." කීමෙන් පෙනෙන්නේ කියන තැනැත්තා අමු මෝඩයෙක් බවයි

රොටියාට හිතෙන්නේ නම් ඔහොමය. උදව් කිරීමට කැමැත්තෝ අනෙක් අයට උදව් කරති. එසේ නොවුනේයැයි කියා කාටවත් නගන්නට බැරිය. අප ගැන අප විසින්ම බලා ගත යුත්තෝය


Thursday, February 12, 2015

අපිත් ත්‍රීවිල් වර්ජනය කරමු ! (ද?)

ලිපියට මාතෘකාව සැපයුවේ උදේ කනවැටුණු සිංහ එෆ් එම් හි විකාශය වුනු වැඩසටහනක් ය

රොටියා ද දිනපතා , උදේ හවස ඔෆිස් යන එන වැඩ කරන ජනතාවගෙන් එකෙකි

මේ රටේ වැඩකරන ජනතාවට , බොහෝ විට අමාරුව ඇත්තේ වැඩ සම්බන්දව නොව ප්‍රවාහනය සම්බන්දවය. උදේ අටහමාරට , නවයට සැනසිල්ලේ සේවයට වාර්තා කරන , හතර වන විට ඔපිසියෙන් පැනවිත් දුම්රිය, සී ටි බි බස් අරක් අරගෙන, අනෙක් එව්වන්ට ඒ පහසුකම් බාවිතා කිරීම එපා කරවන රාජ්‍ය සේවයේ බහුතරය ගැන නොව (බහුතරය යන්න යටින් ඉරක් ගසාගෙන කියවන්න) රොටියා මේ කතා කරන්නේ ඇත්තටම වැඩ කරන ජනතාව ගැනය.

කාර්යාලයට යාමට රජයේ ප්‍රවාහන සේවා බාවිතා කරන්න හැකි නම් මල් හතය. ඒවා කොටන්නේත් නැත. ලතවන්නෙත් නැත. වියදමද පහසුය. ඔක්කොම හොඳයි මුක්කම නරකයි කිව්වා සේ තියෙන එකෝම එක පරහ අර ජාතියේ එව්වන්ය. උන් හතර වදිද්දී පැනගෙන විත් ආසන බදු ගනිති. දුම්රිය නම් ගමන් වාරයට පෙර ඉස්ටේසමේ නවතා ඇති විට. ගමන් වාරය ඇරඹුණු පසු ලඟපාත හිස්ව ඇති අසුන් අත පය බෑග් ලේන්සු (පුළුවන් නම් මේ සඳහා උන් අහවල් ඒකත් පාවිච්චි කරනවා ඇත) වලින් වසාගෙන දන්නා උදවියව ඒවායේ වාඩි කරවා ගැනීමට වලි කති..

දුම්රියේ ගමන ගැන කියන්නට ගියහොත් එය වෙනමම පොස්ටුවක් වන නිසා දැන් රොටියා මාතෘකාගත වෙනවාය.කතා කරමින් උන්නේ ගමනාගමය ගැනය..

බස්රියේ ගොස් ඇතිවුණු එකා ඊ ලඟට දුම්රියට පැන එහිවත් යන්න පුලුවනිදැයි විමසා බලයි. දුම්රියේ ඇති උප සංස්කෘතියට හැඩ ගැසිය හැක්කේ නම්, ජිවිත කාලය තුල දුම්රියේ ගමන ඇත හරින්නේ ඌ හෙම නොවේ. සින්දුවක් කියා, කාඩ් අතක් සෙල්ලම් කර, මොනවා හෝ බඩට දාගෙන..

ඒකත් දිරවා ගත නොහැකි සුළුතරයට ඉතිරිවන්නේ කියක් හෝ වැඩිපුර දීගෙන හෝ කාර්යාල ප්‍රවාහන සේවයකට ගොඩවන්නටය. ඔපීසිය ඉදිරියෙන්ම යන එකක් ලැබුනොත් නියමය. ඒත් බොහෝ විට කාර්යාල ප්‍රවාහන සේවයෙන්ද ගොස් ස්වල්ප දුරක් බසයෙන් යන්නටද සිදුවේ

තුන් සක රිය පිහිටට එන්නේ ඔන්න ඔවැනි වෙලාවටය. ඒ කියන්නේ නියමිත වෙලාවට , නියමිත නැවතුමකට පැමිණෙන කාර්යාල ප්‍රවාහන සේවය හෝ දුම්රිය හෝ (කලාතුරකින්) බස්රථය මගහැරී වල්මත් නොවෙනු පිණිස නුවණැත්තෝ තුන් සක පාවිච්චි කරත්! එහි ආනිසංස මෙසේය

1. පොදු ප්‍රවාහන සේවයට වඩා ඉක්මන් වීම - ඒත් සමහරක් රියදුරෝ යන්න යන්නේම වම් ධාවන තීරුවේ බසයක් පිටුපස කොටමින්මය. උන් හිතන් ඉන්නේ මිනිස්සු මුදල් ගෙවා ත්‍රිරෝද රියෙහි යන්නේ වාඩි වී හුලන් වැදී වැදී ආතල් ගැනීමට කියාය. රොටියා නම් පළමු අනතුරු සංඥාව නිකුත් කර , දෙවැනි වතාවේ රථය නවතා ගිය දුරට මුදල් ගෙවා වෙන අතක් බලා ගන්නවාය.

2. වාහන තද බද වලදී රිංගා යා හැකි වීම

3. අතුරු පාරවල් වලින් යත හැකි වීම

4. වැසි වෙලාවට

5. අසනීප වෙලාවට

හොඳය. ඒත් ඔක්කොම නොවේ. සාධාරණ විනීත රියදුරන් අතලොස්සක් සිටියද යට කියන ඒවා ගැන නම් කතා නොකරම බැරිය

2000 CC එන්ජින් දාරිතාවයකින් යුත් රොටියාගේ වාහන ය පෙට්‍රල් ලීටරයකින් කිලෝමීටර 8 ක් දුවන්නේ හොඳටම කොට කොට ගියොතින් පමණක්ය. බොහෝ විට ලීටරයකට කිලෝමීටර 10ක් දුවයි (කිලෝමීටරයට රුපියල් 14 යි )

1500 CC එන්ජින් දාරිතාවයක් ඇති රොටියාගේ මස්සිනාගේ වාහනය ලීටරයකට කිලෝමීටර 15 -16 අතර ප්‍රමාණයක් දුවයි. නරකම වේලාවකදී නම් 12-14 ත් අතර ප්‍රමාණයක් දුවයි(කිලෝමීටරයට රුපියල් 9 යි )

800 CC එන්ජින් දාරිතාවයක් ඇති රොටියාගේ මිතුරෙක්ගේ වාහනය නිදහස් ගමනකදී නම් ලිටරයට කිලෝමීටර 20 කටත් වඩා දුවනවාලු. නැත්නම් 18 පමණ වැඩ කරනවාලු (කිලෝමීටරයට රුපියල් 6.50 යි )

මේවා ඉලෙක්ට්‍රික් වත් , දෙමුහුන් වත් රථ හෙම නොවේ. සාමාන්‍ය වැසියන් බාවිතා කරන පරණ පෙට්‍රල් වාහන තුනක් පමණි

ඕවා ඔහොම වෙද්දී 200 CC එන්ජින් දාරිතාවයක් ඇති තුන් සක් රාජයා කිලෝ මීටරයකට රුපියල් පනහකට කිට්ටු ගණනක් අය කරනු ලබයි. හතළිහයි යි කිව්වාට ඔක්කොම මීටර එක වගේ නෙවේය. සමහර විටෙක ලැම්බෝගිනි වෙස්වලාගෙන ත්‍රිරෝද රථ ලෙස පෙනී සිටිනවාද කියා කියන්නත් බැරිය. කොහොමෙන් කොහොමහරි දුප්පතාගේ වාහන යයි කියමින් මොවුහු සූරා කන කෑම නම් අපූරුය

ගෙවෙන ටයර, කෑලි බෑලි, දවසේ ලාබය ඔය ඔක්කෝම එකට එක්කාසු කලත් කිලෝමීටරයකට රුපියල් 20- 25 අතර අගයක් නම් සාදාරණයයි කිව හැක. දැන් කරන්නේ බාගෙන කන්න තියෙන වල ඉහගෙන කෑමකැයි රොටියාට හිතෙන්නේ ඒ නිසාය

ත්‍රිරෝද රථ හිමිකරුවන් කෝටිපතියෝ නොවෙත්! අනෙක් අතට එහි ගමන් ගන්නා මගින්ද කෝටිපතියෝ නොවෙති.

අනෙක් ප්‍රධානම කරුණ නම් මෙම රියදුරන්ගේ ඇති අවිනීත රිය ධාවනයයි. ප්‍රධාන නගර වල වාහන තදබද වලට වැඩි දායකත්වයක් සපයන්නේද ඔවුන්ය

කෙටි මං තිබියදී, මගින් මුලා කරමින් දිගු පාරවල දක්කාගෙන යන මීටර් රතයන්ද බහුලය. අවධානයෙන් සිටින්න

අනෙක නම් පොඩි එව්වන් බලු පැටවුන් සේ පටවාගෙන්, උන්ව පාසල් වලට දක්කන ත්‍රිරෝද රථයන්‍ ය. අර ඩිසල් රථවල නම් පිටුපස බක්කියේත් පොඩි එව්වන් රංචු රංචු පටවයි. ඔයින් එකක් වැරදිලාවත් හැප්පුනොත් බඩු හම්බවෙන්නේ ඔයාකාරව අනාරක්ෂිතව ළමුන් පිටත් කර හරින බුරු අම්මල තාත්තලාටය

මොන දේ උනත් වැස්ස වෙලාවට ත්‍රිරෝද රියදුරන් බොහොමයකගේ ගනකම නම් මාරය. අන්ත අසරණ වී ලඟට පැමිණෙන මගීන්ටද 'බැහ්හ්' ගායි

එක්තරා මහා වැසි දිනෙක , අමු අමුවේ තෙමෙමින් ඉක්මන් ගමනින් බොරැල්ලේ ඇවිද යන ගෑණු ළමයෙකු දුටිමි. පාරේ උන් සියල්ලෝම කඩපිල් අස්සේ හුන් නිසා , අත් බෑගයක් එක උරයකද, බර යයි දිස්වුනු ලැප්ටොප් බෑගයක් අනෙක් උරයේද එල්ලාගෙන , කුඩයක්ද රහිතව තෙමි බත් වෙන මේ ගැහැණු ළමයා කැපී පෙනිණි. රොටියා ඈ දෙස බලා හුන් විනාඩි කිහිපය තුල ඇය ත්‍රිරෝද රථ ගණනාවකින්ම විමසනුද, ඔවුහු සියල්ලෝම හිස් සලා ප්‍රතික්ෂේප කරනුද දුටිමි. අවසානයේ ඇය දෙස බලාහුන් තරුණ වයසේ රියදුරෙකු , මහා ගෝට්ටියක් කර සිය රථය හරවාගෙන ඈ හුන් දෙසට පැමිණ ඈව රථයට නංවා ගත් කල රථයේ වාඩි වූ ඇගේ මුහුණේ වූ සැනසිල්ලද, බිය පහවීමද මනාව හැදින්නෙමි

ඉතින් ඔව්වා ඔයාකාරය. අපට කෙතරම් අවැසි උවත්, ඔවුන්ට අවැසි නැති නම් අප යටත් විය යුත්තෝය.

අලුත් ආණ්ඩුවත් සමග මේ හිසරදයක්ව පවතින ට්‍රැෆික් ප්‍රශ්නයට හා ත්‍රිරෝද රථ ප්‍රශ්නයට විසඳුමක් ලැබුනොත් නම් ජාතිය. රටේ වැඩ කරන ජනතාව උදේ හවස විඳින දුකත්, වැඩ නොකරන එව්වන් වැඩ කරන උන්ටත් පුප්පන් රථ පිරිවරාගෙන යන හැටියත් දුටු විට බිම පෙරලීගෙන අඬන්න හිතෙන්නේය. එහෙව් ජනතාව ත්‍රිරෝද රිය පාවිච්චි කරන්නේ ඉක්මනින් සහ පොඩ්ඩක් පහසුවෙන් ගමන් ගන්නට මිස බල්ලන්ට ගහන්න සල්ලි ඇති නිසා නොවේ..

Monday, February 2, 2015

ඇමෙරිකාවේ එහෙම උනත් ලංකාවේ එහෙම වෙන්නේ නෑ....

මීට අවුරුදු කිහිපයකට පෙර වෙස්වලාගෙන රාත්‍රී සංචාරයක යෙදුන ඔබාමා නොහොත් දෙවන බරක් හුසේන් ඔබාමා ණෝ සිය යටත් වැසියා ගෙවන්නේ බොහොම ගතියක් නැති ජිවත බව සොයා ගන්නට යෙදුනාය. ඔවුහු ඔහේ ජිවත්වන්නන් වාලේ ජිවත් වන බවත් , කිසිම සතුටකින් දවසැරින්නේ නැති බවත් අවබෝද වූ එතුමාගේ හිත වෙඬරු පිඩක් මෙන් උනුව ගියාහුය

යටකී කාරණය හේතුවෙන් දවස් ගණනක් නිදි නොලද ඔබාමා පිළිබඳව අවදානයෙන් උන් මිචෙල් ඔබාමා නොහොත් ඔබාමා අගබිසව, එක දවසක රාත්‍රියේ ඔබාමා යට කලිසම හා බාටා දෙක පමණක් පැළඳ ගෙන සිය නිල කාර්යාලයට යන්නට සුදානම් වූ තැනේදී , ඉවසීම හමාර කර ගන්නට යෙදුනාය

මිචෙල් : 'මොකද්ද මනුස්සයෝ මේ මහා රෑ නටන නාඩගම'

ඔබාමා : (බියෙන් හැකිලී) 'මං මේ ඔෆිස් යන්න කියල'

මිචෙල් : (පුපුරමින්)'ජංගිය විතරක් ඇඳන් ඔෆිස් යන්න. තමුන්ගේ එකක් නම් කමක් නෑ. මගේ හොඳම වික්ටෝරියා සික්‍රට් එකක්...මම මේ දවස් ගානක් බලාගෙන හිටියා. ඔහෙට මොකද වෙලා තියෙන්නේ'

ඔබාමා : (ලජ්ජාවෙන් තමුන් ඇදන් ඉන්නා එකම ඇඳුම දෙස බලා) 'ලෝකෙට ලොක්කා කිය කිය හිටියට මැණිකේ මම මේ ලඟදි දැන ගත්තා මගේ රටේ මිනිස්සු ඉන්නේ බොහොම කලකිරීමෙන් කියල. (හඬා වැටෙමින්) 'මුන්ටදෙන්න තියෙන ඔක්කොම දීලත් ඉන්නේ නිකන් ඇට ගිලපු රිලව් වගේ. මේවා දැනගත්තොත් හිනා වෙන්න කී දෙනෙක් ඉන්නවද දෙයියනේ'

මිචෙල් :'ඔහේ ඕක දැනගත්තේ ඊයේ පෙරේදා උනාට මම නං දැනන් හුඟක් කල්'

ඔබාමා :(එහෙම දැනගත්තනන් තොට මට ඕක කියන්න හිතුනේ නැද්ද ගෑනියේ) ' මොකද රත්තන් ඒ..'

මිචෙල් :' ඔහේ ලොරි ටෝක් දිදී ඉන්න වෙලාවේ අන්න ලංකාවේ ලොකුම ත්‍රස්තවාදියාව මරලත් අවුරුදු තුනක් විතර ගිහින්. ඉතින් මෙහෙ මිනිස්සුන්ට මොනවා කියල හිතෙනවා ඇතිද?. ඔහෙට තාම ඔසාමාගේ නැට්ටවත් අල්ල ගන්න බැරි උනානේ..'

ඔබාමා :'අඩේ.. මට ඕක කල්පනාවට ආවෙම නෑනේ'

ඊළඟට මිචේල්ට තොත්තුවක් දී පොඩ්ඩක් හුරතල් කොට, වඩාත් සාම්ප්‍රදායික ඇඳුමකින් සැරසුණු ඔබාමා වහාම ගියේ සිය ආරක්ෂක ප්‍රධානින් හමුවෙන්නටය. එතනින් සීල් හමුදාවට ගිය නියෝගය හමුවේ ඔසාමාට ටිකට් එක හම්බුවුණු අතර මෙතෙක් කල් ගතියක් නැතිව හුන් ඇමෙරිකානුවෝ විදි බැස රතිඥ්ඥා පත්තු කොට කැවුම් කිරිබත් උයා ප්‍රීතිවන විට ඔබාමාද පස්වනක් ප්‍රීතියෙන් ඇලලී ගියාහුය

ඉන් අනතුරුව ඔබාමා විසින් මෙතරම් කල් බුකවාගෙන උන් මහජනයාට පොඩි ලල් එකක් දෙන්නට සිතා, කැඩුණු බිඳුණු පාරවල් පිළිසකර කොට තාර පැලැස්තර අලවා , අලුතෙන්ද පාරවල් හැදු කල් හි ජනතාවද ප්‍රීතියෙන් ඔකදව ගියාහුය. යන යන තැන ඇමෙරිකානුවෝ ඔබාමා ට වැඳ වැටෙන්නට වූහ.

සිය රාජකීය ජනලෝලිත්වය වැඩි කර ගන්නට තව තව මාර්ගයන් සෙවූ ඔබාමාට ආසියාවේ එක් නායකයෙකු විසින් ලබා දුන් අගනා උපදේශයකි

ආසියානු නායකයා: 'උඹ දැන් යන යන තැන පොඩි එකෙක් දැක්කාම වඩා ගනින්. එතකොට ඔය යක්කු උඹට ඕන දෙයක් කරලා දෙනවා' ' ඊළඟට උඹ ස්ටේජ් වලදී මිනිස්සුන්ට පොඩි පොඩි ආතල් දීපන්. ඔය ඇහැට කනට පෙනෙන ලමිස්සියෙක් දාල , කලන්තේ දාල වැටෙනවා වගේ..'

ඔබාමා: (ආසියානු නායකයාව සිප වැළඳ) ' මෙහෙ ඉන්න බුරු සිමාල අස්සේ උබ වගේ එකෙක් හිටියනං අද මාත් මිනිහෙක් තමයි බං '

ආසියානු නායකයා :' උඹට මම වසී යන්තරෙකුත් හදල එවන්නන්කෝ.. ඒක අතේ තියෙද්දී උඹ ලඟට ඕනෑ එකෙක් බඩ ගාගෙන එයි. බඩ ගාගෙන..'

ඔබාමා: 'අඩේ .. ඒක නං මාර මැජික් එකක් නේ බං. හදල දියන්කෝ මටත් එකක්..'

ඔන්න ඔයාකාරව ඔබාමාණෝ දැහැමෙන් සෙමෙන් සිය රාජ්‍ය කරන සමයෙහි, රොටියාටද ඇමෙරිකාවේ පොඩ්ඩක් ඇවිද එන්නට පොටක් පෑදුනාය. රොටියාව ගුවන් තොටුපලේදී පිළිගත්තේ ඇමෙරිකන් මිතුරෙකු වූ අතර ඔහු විසින් අවදිව සිටින සෑම වෙලාවකදීම ඔබාමා ප්‍රශස්ති ගීතයක් උරුවම් බෑමේ යෙදී සිටියේය. ඉවසා බැරිම තැන 'ඔය අටමගලේ වහගනින් යකෞ..' යයි රොටියා තර්ජනය කරන්නට යෙදුනු තැන, හෙතෙම දෑසේ කඳුළු පුරවාගෙන රොටියාට ඔබාමා ද්‍රෝහියා යයි බැන වැදුනේය. එයින් පසු රොටියා ඌට හිතුවක් කරගන්නට ඉඩ දී කට පියාගෙන සිටි අතර , ඌ පමණක් නොව සෑම ඇමෙරිකන් කාරයෙකුම ඔය සින්දුව නිතරම ගායනා කරමින් ඉන්නා බවද සොයා ගන්නට යෙදුනාය

ගුවන් තොටුපල අලංකාර කිරීම සඳහා ඔබාමා විවිද ඉරියව් වලින් පෙනී ඉන්නා දැවැන්ත ප්‍රමාණයේ චායාරුප රැසක් ප්‍රදර්ශනය කර තිබූ අතර ඒවා එක් එකක් පෙන්වමින් විස්තර කරන්නට යෙදුනු රොටියාගේ මිතුරා විසාල කන්දොස්කිරියාවක් විය

එයින් එකක් ළඟ නැවතුනු ඔහු ආඩම්බරයෙන් පපුව පුම්බා , ඊළඟට බඩ දික් කරගත්තේය.
'මචං මේ අපේ ජනාදිපති තුමා වඩාගෙන ඉන්නේ මගේ නංගි ඉස්සරලා බැඳලා හිටපු මිනිහගේ , දෙවෙනි ගෑනිගේ පොඩි එකා.. බලපන් .. සිරියාව..'

එතන විනාඩි පහක පමණ ප්‍රමාදයකින් පසු අවසානයේ රොටියා හා මිතුරා ගුවන්තොටුපලින් පිටවීමේ ගේට්ටුව වෙත ලඟා උනාය.

එතැන සිට මහා වාහන පෝලිමකි..

රොටියා: 'මොකද මචං මේ..'

ඇමෙරිකානු මිතුරා: 'මේ පොඩි ට්‍රැපික් එකක් බං. උඹට කියන්න කොච්චර ට්‍රැෆික් තිබ්බත් දැන් අපේ පාරවල් ටික ටොයිස් ඈ...'

ටොයිස් පාරවල් තිබියදීත් මේ සා තදබදයක් ඇයිදැයි විමසු කල, හෙතෙම නප්පියට තදවී පාරවල් කොහොම තිබ්බත් අවසානයේ ඔක්කොම පාරවල් වල පිටවීම එකක් නිසාත්, පදිකයන් පාර මාරු වන විට ඔවුන්ට ඉඩ දිය යුතු නිසාත්, පොඩ්ඩක් පෝලිමේ හිටියාම ගෙවෙනවා දැයි ඇසීමට යෙදුනාය.

රොටියා: ' ඇයි බන් ඕවා හදද්දිම පාරවල් මාරු වෙන තැන් වලට පාලම් දාල, පාරවල් එකතු වෙන තැන් වලට විකල්ප දාල හැදුව නං ඉවරනේ. අපේ රටේ නං එහෙමයි..'

ඇමෙරිකානු මිතුරා: (මහා හඩින් සිනාසී) ' ඒ උඹලා.. මේ අපි.. අපේ රටේ පාරවල් හදන්නේ පියවරවල් විදියට. එකක් හදනවා. අනික කඩනවා. අනික හදනවා. පලවෙනි එක කඩනවා... පාලම දානවා....බ්ලාහ් බ්ලාහ්'

ඌ කියූ හරුපයට රොටියාගේ මොළය කෙතරම් විකාර උනාදැයි කිවහොත් එතනින් එහාට රොටියා ඌ සමග මහා මාර්ග ගැන වචනයක් වත් කතා කළේ නැත.

ඇමෙරිකානු මිතුරා:' අඩේ උඹ මට මම කියපු පොල් දෙකයි, ගල් දෙකයි ගෙනාව නේද?'

එයිට පිළිතුරු ලෙස රොටියා තමුන්ට ලබා ගත හැකි වුයේ පොල් එකක් හා ගල් එකක් බවත්, එය ලබා ගැනීමටත් සෑහෙන දවසක් බලා ඉන්නට සිදුවූ බවත් ඌට පැහැදිලි කරන්නට යෙදුනාය.(අන්න මං කොත්තමල්ලි කිලෝ පහක් ගෙනාව ඔක්කොටම හරියන්න)

ඇමෙරිකානු මිතුරා: 'මොකද්ද බන් උඹලගේ රට. මෙලෝ රහක් නෑනේ. අපේ නං ඕනෑ වෙලාවක ඕනෑ විදියට බඩු තියනවා. කුඩු නං එහෙමයි. මල් නං එහෙමයි. පෙති නං ඒත් එහෙමයි, බොන්න සූ ගාල... එක නෙමෙයි මොනාද බන් කොට්ටමල්ලි කියන්නේ?'

රොටියා: ' කොට්ටමල්ලි නෙවෙයි යකෝ කොත්තමල්ලි.. කොත්තමල්ලි නැතුව උඹල මොනාද පොඩි උණකට හෙම්බිරිස්සවකට බොන්නේ..?'

ඇමෙරිකානු මිතුරා:' මොනාද ලොක්කා මේ අහන්නේ.. පැනඩෝල්, බ්ලුෆන් ඔය තියෙන්නේ කෝටියකට බඩු.. වෙඩි වගේ තමා ඈ..'

රොටියා: ' එතකොට උඹල හොද්දකට, සුප් එකකටවත් කොත්තමල්ලි දාලම නැද්ද?'

ඇමෙරිකානු මිතුරා:' හොද්දට අජිනමොටෝ දැම්මා. සුප් එකට සුප් කැටයක් දැම්මා. සින් සින් ගෑවා . කෑවා'

එතනින් එහාට රොටියා අමෙරිකානුවනේ සවුක්ය තත්වය හෝ, ජිවිත අපේක්ෂාව ගැන ඌ සමග කතා කළේ නැත.

රොටියා: 'මොකෝ බන් මේ පාර පුරා මෝ බයිකුයි, ත්‍රිවීලුයි පිරිලා?'

ඇමෙරිකානු මිතුරා: (රොටියා දෙස හැරී ඇසක් ගසා) ' තෙල් , ගෑස් පට්ට ගණන් බන්. ඕවයි හොඳට තෙල් කරනවනේ.. ඒකයි මිනිස්සු ඕව ගන්නේ'

රොටියා: ' ඇයි බං මේ දවස් වල තෙල් මාර අඩුයිනේ.. වර්ල්ඩ් මාකට් එක බහිද්දී අඩු කරන්න එපැයි තෙල් ගාන . අපි නං මේ ටිකේ මාර ආතල් එකේ ඉන්නවා තෙල් අඩු හින්දා..'

ඇමෙරිකානු මිතුරා:' ඔන්න දැක්කද.. ඕක තමයි උඹලගේ කාලකන්ණි කම කියන්නේ. යකෝ අපේ ලොක්කා තෙල් අඩු කරන්නේ නැත්තේ අපිට තියෙන ආදරේට. තෙල් අඩු කලොත් මිනිස්සු හැම රෙද්දටම වාහන එළියේ දාගෙන ජෝගි නටන්න පටන් ගනියි. එතකොට ට්‍රැෆික් එක වැඩි වෙනවා.. පරිසර දුසනේ වැඩි වෙනවා'

රොටියා: ' ඇයි බන් දැනුත් පට්ට ට්‍රැෆික් නේ. තෙල් අඩු වුනා කියල උඹලට අමුතුවෙන්න වැඩිවෙන්න කියල ට්‍රැෆික් එකක් නෑනේ..'

ඇමෙරිකානු මිතුරා:' ඔන්න ඕක තමයි තමුන් ගැන විතරක් හිතනවා කියන්නේ. ලොක්කා අපිට ආදරෙයි වගේම අපිත් අපේ ලොක්කට ආදරෙයි. ලොක්කත් දෙයියනේ කියල කියක් හරි හොයා ගන්න එපැයි..උඹලට තේරෙන තරම තමයි ඔය.... රෙද්ද.. '

මේපාර නම් උගේ හිත සැහෙනට සවුත්තු වූ බව රොටියාට හැඟුණු නිසා එතනින් එහාට ඔබාමාට ආදායම් ලැබෙන ආකාරය ගැන රොටියා ඌ සමග කතා කළේ නැත

ඇමෙරිකානු මිතුරා:(තමන්ටම) ' ඔසාමව පරද්දපු අපේ රජ්ජුරුවන්ටනේ මූ මෙහෙම කියන්නේ..'

ඊලග පැය කාලක් පමණ ගෙවී ගියේ නිහඬවමය. රථයද කිලෝමිටරයක් පමණ ඉදිරියට ඇදී තිබුණාය. නිහඬතාවය බින්දේ ඌමය

ඇමෙරිකානු මිතුරා:' අඩේ උඹ මට අර ටින් මාළු ටින් එකක් ගෙනාව නේද බන්. ගිය සැරේ එක නං ජාති..'

එයිට පිළිතුරු ලෙස රොටියා, ටින් මාළු එකට දහයක් ගෙනාපු බවත් , ඔවැනි සුළු දෙයකට ඔච්චර නහින්නේ ඇයිදැයි උගෙන් විමසන්නට යෙදුනාය

ඇමෙරිකානු මිතුරා:( සංවේදීව)' උඹ මොනවා උනත් හිත හොඳ එකා බන්. පහුගිය ටිකේ මගේ ගෑනිට ටින් මාළු කන්න ආසයි කියල ගන්න ගිහින් ගාන අහල හැරිලා බං. අපේ පොඩි එකා දැන් ජරා බර ගගා කන්නේ බලූ විස්කෝතු. ඒවා ලාබයි , ගුණයි හින්ද අපි ඌට මුකුත් කියන්නෙත් නෑ

පසු සටහන: මෙය මඩක් හෙම කියා වරදවා හිතන්න එපාය. ලිපිය ලියන්න හේතු වුනේ පහුගිය ටිකේ බඩු අඩුවීම ගැන සමහරුන්ගේ අදහස් ඇසුණු නිසාය. පක්ෂ පාට කන්නාඩි ගලවා තබා අවංකවම සතුටු වූ පිරිසක් මැද්දේ , පාට කන්නාඩි වලින් බලමින් විරවාගෙන උන් කිහිප දෙනෙකු කතාවට වස්තු බිජ සපයන ලද්දෝය.