Sunday, July 20, 2014

ඒ ලෙවෙල් කතා වස්තුව - රොටියාගේ සුබ පැතුම

රොටියාගේ ගෙදර පොඩිම එකා මේ ටිකේ ඉන්නේ උඩය.උඩ කියන්නේ අර රොටියාගේ ගෙදර තට්ටු දෙකකි යයි පවසා නයා අරින්නට නෙවේය. උඩ කියන්නේ ඌ මේ ටිකේ ඉන්නේ පොලවේ පයගසා ගෙන නොවේ කියන එකය. ඌට පවුලේ ඔක්කොම එකතු වී සලකන්නේ රජෙකුට මෙන්ය. හොස්ස ලඟින් යන කෝඳුරුවෙකුට වුවත් වෙඩි තබන මානසික මට්ටමක පසුවන ඒකාව රාජකීය මට්ටමට ඔසවා තබා ඇත්තේ ඒ ලෙවෙල් නොහොත් උසස්පෙළ විබාගය ය.

පසුගිය අවුරුදු දෙකහමාර තුන තුල ඒකාගේ දින චර්යාව වෙනස් වුනේ මෙන්න මේ විදියටය
1. ඉස්කෝලේ යනවා. (මෙය සියයට අසුව යයි කියන කෙහෙල්මල සම්පුර්ණ වෙනකන් සිද්ද වී ඊළඟට නැත්තටම නැති වී ගියේය)
2. කනවා (මෙය අසාමාන්‍ය ලෙස වර්දනය විය. පාඩම් කරන විට එන නිදිමතට එකම විසඳුම කෑම යයි ඇදහු නිසා මේ වන විට ගෝලාකාර ස්වාබාවයකට පත්වී සිටියි)
3. පාඩම් කරනවා( මෙය සිද්ද වුනේ අමුතුම ශ්‍රේණියකට අනුවය. පාඩම් කරන සෑම විනාඩි පහකට සැරයක් විනාඩි දහයක විවේකයක්ද, පැය බාගෙකට වරක් කෑම සඳහා පැය කාලක්ද, පැයකට වරක් ගේ වටේ ඇවිද ඒමට විනාඩි විස්සක විවේකයක්ද ආදී ලෙස මේකා රොටියාව මෝල් වෙන අන්දමේ පාඩම් කිරීමක යෙදුනාය)
4. ටි වී බලනවා (මනස විවේක ගන්නට..)
5. නිදියනවා (දවසේ ඕනෑම වෙලාවක, ඕනෑම ඉරියව්වකින් නිදා ගැනීමට මේ වනවිට ලෝක ප්‍රසිද්ද තත්වයට පත්වී හිඳියි)

මේ ටිකේ යකා තත්වයට පත්වී ඇති නිසා ,රොටියා, පොඩි එකාට කතා කරන්නට පෙර " බලුගැත්තාට සමාව අවසර" යනුවෙන් සමාව ඉල්ලා, දෙවනුව අවශ්‍ය කාරණය පවසනවාය. (රොටියා මෙසේ කියන විට උගේ බැල්ම මිනීමරු වී, කතාව මාරාන්තික වෙයි)

කොහොම කිව්වත්, ඒ ලෙවෙල් යන්නෙහි මිහිරි රසය රොටියාද විඳ ඇති නිසා , රොටියාට උගේ මානසික මට්ටම තේරුම් ගත හැක. රොටියාගේ පොඩි එකා පමණක් නොව, ඒ ලෙවල් කරන හැම එකා ගැනම රොටියාට පුදුමාකාර අනුකම්පාවක් දැනෙන්නේ, එව්වන් ඔක්කෝම ජිවිතයේ මුහුණ දෙන අමාරුම හා තීරණාත්මකම තරඟ විබාගයට මුහුණ දෙන බව මතක් වෙද්දීය

රොටියාට , ගෙදර පොඩි එකාත්, මේ රටේ ඉන්නා ඔක්කොම පොඩි එවුනුත් එකය. ඒ ඔක්කොම එව්වන්ට, අගෝස්තු පස්වෙනිදායින් පටන් ගන්නා උසස්පෙළ විබාගයට හොඳින් පාඩම් කරගන්නටත්, පාඩම් කරන දේ මතක හිටින්නටත් රොටියා මුළු හදවතින්ම ප්‍රාර්ථනා කරනවාය. මෙහෙම කියන්නේ මේ ටික විබාගයට කලින් දවසේ කියා වැඩක් නැති නිසාය. පාඩම් කරනවානම් කරන්න ඕනේ දැන්ය..

2 comments: